काठमाडौं । मंगलबार ए डिभिजन लिग रोक्न माग गर्दै चार क्लबले संयुक्त रूपमा अखिल नेपाल फुटबल संघ (एन्फा) मा पत्र बुझाए । ‘ए’ डिभिजन क्लबहरू जावलाखेल युथ क्लबका अध्यक्ष गहेन्द्र क्षेत्री, फ्रेन्ड्स क्लबका अध्यक्ष दिपक थापा, ब्रिगेट ब्वाइज क्लबका अध्यक्ष लालकुमार पुन र थ्री स्टार क्लबका महासचिव सञ्जिव सिल्पकारले एन्फा महासचिव इन्द्रमान तुलाधरलाई भेट गरी ज्ञापनपत्र हस्तान्तरण गरेका थिए ।

तर, उक्त विषयमा एन्फाले कुनै प्रतिक्रिया दिएको छैन । एन्फाले बैठक बोलाएर कुनै छलफल गर्ने भनेको छ । एन्फा अध्यक्ष कर्मा छिरिङ शेर्पाको अध्यक्षतामा एन्फाले बैठक बोलाएर यस विषयमा छलफल गर्ने छ । कोरोना महामारीकाबीच नेपाली फुटबलको घरेलु लिग एक सिजन भएन । उक्त सिजन नभएको लिग यो सिजन पनि क्लबहरूले महामारीकाबीच नगर्न माग गरे ।
 
एन्फाले भने यो विषयलाई राजनीतिको रूपमा लिएको छ । कोरोना महामारीको अवस्था सामान्य हुँदै गएको र सबै खेलाडीले कोरोना खोप लगाइसकेको अवस्थामा मात्र आफूहरूले लिग गर्ने भएकाले महामारीको कुनै किसिमको जोखिम नहुने बताएको छ । कोरोनाको कहरकाबीच पनि एन्फाले लिग गर्ने योजना बनाएको छ । 

ए डिभिजन लिगका लागि मात्र सरकारले चार करोड बजेट विनियोजन गरेको छ । उक्त बजेटलाई एन्फाले सकरात्मक रूपमा लिएको छ । सरकारले छुट्याएको बजेट मात्र नभई विश्व फुटबलको सर्वाेच्च निकाय फिफाले पनि नेपालको लिग गर्नका लागि पाँच लाख डलर छुट्याएको छ । उक्त रकमसँगै एन्फाले अन्य रकम विनियोजन गर्दै लिग गर्ने योजना बनाएको एन्फा अध्यक्ष शेर्पाले बताए ।
 
“हामीले तोकिएकै समयमा लिग गर्ने योजना बनाएका छौँ । एक वर्ष नभएको लिग लगातार दोस्रो वर्ष पनि गर्न नपाउँदा यसले राम्रो सन्देश जाँदैन । खेलाडी र फुटबल समर्थकका लागि पनि लिग नहुँदा राम्रो सन्देश मानिँदैन । कोरोनाको माहोल बिस्तारै नियन्त्रण हुँदै गएको छ । सबै खेलाडीहरूले खोप लगाइ सक्नेछन् । त्यसपछि जोखिम झनै कम हुनेछ,” अध्यक्ष शेर्पाले बाह्रखरीसँगको कुराकानीमा भने । 

शेर्पाले यास्तो समयमा पनि लिग नगर्न भनेर भन्नु खेलाडीको भविष्य माथि प्रश्न उठाउनुजस्तै भएको बताए । उनले खेलाडी खेल्न तयार भएको अवस्थामा क्लहरू पनि सक्रिय भएर लाग्नुपर्ने बताए । ए डिभिजन लिगमा एक क्लब र प्रतिनिधि मात्र नभएर सयौ खेलाडीको भविष्यको सवाल भएको उनले बताए । अध्यक्ष शेर्पाले कोरोना सम्बन्धि सम्पूर्ण पोर्टाेकल अपनाएर आफूहरू लाग्ने तयारी भएको र त्यसका लागि बजेट पनि तयार भएको बताए ।
 
“कोरोना नियन्त्रण सम्बन्धि सम्पूर्ण प्रोटोकल अपनाउने तरिकाले बजेट विनियोजन गरेका छौँ । सरकारले पनि सहयोग गरेको छ । लिग सुरु हुने समयसम्म सबै खेलाडीले पनि खोप लगाइ सक्नेछन् । त्यसपछि हामीले सावधानि पनि अपनाउने छौँ । कोरोनाको महामारी भयावह भएमा लिगको विकल्प सोचिएला तर यही नियन्त्रण भएमा हामीले जसरी पनि लिग सञ्चालन गर्नेछौँ,” शेर्पाले भने ।
 
उनले लिग गर्न नदिनका लागि एन्फामा राजनिति भइ रहेको पनि बताए । एक वर्ष लिग नहुँदा एन्फा भित्रै पदाधिकारीलाई भन्ने पाटो भएकोले लगातार दुई वर्ष लिग रोख्ने प्रयास भइरहेकोले त्यस्तो प्रयास पनि नगर्न उनले बताए । शेर्पाले लिग नखेल्ने क्लबलाई रेलिगेसनमा राखिने बताए । खेलाडी र खेलको भविश्यमाथि खेलबाड नगर्न उनले आग्रह पनि गरे । 

“लिग नखेल्ने क्लबहरू स्वतः रेलिगेसनमा जानेछन् । विरोधको पाटो एकतर्फ छ तर, खेलाडीकै भविष्यमाथि खेलबाड गर्ने तरिकाले कुनै पनि क्लबले पाइला नचलाऔँ । हामी खेलाडीका लागि हौँ । वर्षमा एकपटक हुने लिगका लागि आनाकानी गर्ने बानीलाई हटाऔँ,” अध्यक्ष शेर्पाले भने । 

गत असार १४ गते एन्फामा भएको ’ए’ डिभिजन क्लबको बैठकले सहिद स्मारक लिग आगामी असोज ३ गतेबाट सञ्चालन गर्ने निर्णय गरेको थियो ।
 
यता थ्री स्टार क्लबका महासचिव सञ्जिव शिल्पकारले यस्तो जोखिमको समयमा खेल नगर्न आग्रह गरेको बताएका छन् । उनले आफूहरूको आशय खेल बिगार्न र खेलकुदमा विकृति ल्याउन नभएको बताए । उनले आफूहरू फुटबल हराउनभन्दा पनि जोगाउनको लागि लागिपरेको बताए । शिल्पकारले अफै अवस्था सामान्य नभएकाले एन्फालाई लिग केही सय पछि गर्न आग्रह मात्र गरेको बताए । त्यस्तै खेलाडी र पदाधिकारीको परिवार लगायतमा पनि यसको जोखिम आउने भएकाले यसलाई केही समयका लागि सार्न पनि आग्रह गरे । 

“हामी फुटबल हराउनभन्दा पनि जोगाउनको पछि लागि परेका छौँ । महामारी अझै नियन्त्रण भइसकेको छैन । अवस्था समान्य भएको छैन । १८ वर्षभन्दा तलका व्यक्तिहरूका लागि अझै खोप नआइसकेको हुनाले खेलाडीदेखि पदाधिकारीको परिवारलाई पनि जोखिम छ । यस्तो अवस्थामा पनि फुटबल गर्न पर्ने विषयमा एन्फाले बल गर्दा पछि आउने जोखिमलाई पनि जिम्मेवारी लिनुपर्छ,” शिल्पकारले बाह्रखरीसँगको कुराकानीमा भने ।