काठमाडौं । काठमाडौं महानगरपालिका फेरि फोहोरमय बनेको छ । एक सातादेखि काठमाडौंका सडकमा थुपारिएको फोहोर उठाइएको छैन ।

निरन्तर वर्षा हुँदा र ल्यान्डफिल्ड साइटमा फोहोर भरिँदा काठमाडौंको फोहोर उठाउन नसकिएको महानगरले जनाएको छ ।

“पटक–पटक फोहोर व्यवस्थापनमा चुनौती थपिँदै आएको छ । अहिले बर्खामा सडकका कारण पनि फोहोर उठाउन सकिएको छैन,” महानगरका वातावरण विभागका प्रमुख हरिकुमार श्रेष्ठले भने, ‘‘अहिले विस्तारै विस्तारै फोहोर व्यवस्थापन भइरहेको छ । निरन्तर वर्षा हुँदा उक्त क्षेत्रको सडक बिग्रिएको थियो । त्यसैले फोहोरका गाडीहरु व्यवस्थापन केन्द्रसम्म जान पाएनन् । अहिले सहज भइरहेको छ, फोहोर उठिरहेको छ ।”

पटक–पटक फोहोर व्यवस्थापनमा समस्या आउने गरेकाले त्यसको दिगो समाधान गर्न पहल भइरहेको महानगरले जनाएको छ । “यसका लागि बञ्चरेडाँडामा ल्यान्डफिल्ड साइट बनाइरहेका छौँ । असोज अन्तिमसम्म बञ्चरेडाँडामा ल्यान्डफिल्ड साइट तयार भएपछि फोहोर व्यवस्थापन सहजै गर्न सकिनेछ,” उनले भने ।