दाङ । दाङमा कोरोना संक्रमितको संख्या घट्दै गएको छ । दाङमा जेठको तेस्रो सातादेखि कोरोना संक्रमितको दर घट्न थालेको स्वास्थ्य कार्यालय दाङका प्रमुख कमल चन्दले जानकारी दिए । उनकाअनुसार निरन्तरको निषेधाज्ञा र उच्च सतर्कता अपनाएकाले जिल्लामा कोरोना संक्रमितको संख्या घट्दै गएको हो ।

पहिले दैनिक जिल्लामा ७०–७५ प्रतिशत व्यक्तिहरूमा कोरोना संक्रमण हुने गरेकोमा जेठको तेस्रो सातादेखि दैनिक २० देखि ३० प्रतिशतमा कोरोना संक्रमण हुने गरेको प्रमुख चन्दले बताए । अहिले दाङमा सक्रिय संक्रमितको संख्या ३०७ जना रहेको छ । 

यो वर्ष मात्रै जिल्लामा पिसीआर विधिबाट कोरोना परिक्षण गर्दा ११ हजार ५ सय ९१ जनामा कोरोना संक्रमण पुष्टि भएको थियो । जसमध्ये २४३ जनाको मृत्यु भएको स्वास्थ्य प्रमुख चन्दले बताए ।

कोरोना विशेष अस्पताल बेल्झुण्डीमा २५ जनाको उपचार जारी
दाङको कोरोना विशेष अस्पतालमा अहिले २५ जना सक्रिय कोरोना संक्रमितको उपचार भइरहेको छ । जसमध्ये २ जना पूर्व रुकुमका २ जना रोल्पाका र २१ जना दाङका कोरोना संक्रमितहरूको उपचार भइरहेको अस्पताल व्यवस्थापक दोर्ण वलीले जानकारी दिए । 

उपचाररत मध्य १५ जनाको आईसीयूमा र १० जनाको एचडीयूमा उपचार भइरहेको र त्यसमध्ये ४ जनाको अवस्था चिन्ताजनक रहेको वलीले बताए ।

व्यवस्थापक वलीका अनुसार अस्पतालमा वैशाखमा दैनिक १०–१५ जना अस्पतालमा कोरोना संक्रमितहरू भर्ना हुन आउने गरेकोमा जेठको तेस्रो सातादेखि दैनिक २–३ जना विरामी अस्पतालमा भर्ना भइरहेका छन् । 

अहिले अक्सिजनको पनि अभाव छैन । हाल दैनिक दुई सय सिलिन्डर अक्सिजन आउने गरेको छ । तीमध्ये १५० सिलिन्डर खपत हुने गरेको छ भने ५० सिलिन्डर अर्को दिनका लागि बाँकी राख्ने गरिएको छ ।

कोरोना बिशेष अस्पताल स्थापना भए देखि अहिले सम्म ८४ जनाको मृत्यु भएको छ भने ३४ जना अन्य अस्पतालमा रेफर गरिएको वलीले जानकारी दिए ।