काठमाडौं । नेपाली फुटबल टोलीमा पछिल्लोपटक आक्रामक फुटबलको चर्चा छ । कुवेती प्रशिक्षक अब्दुल्लाहा अल्मुताइरीले नेपाली टोली सम्हालेको केही महिनामा नै यसले चर्चा पाउन थाल्यो । 

उसोत नेपाली फुटबलमा नयाँ प्रशिक्षक आउँदा यस्तो चर्चा चल्ने सधैँ चल्छ ।  त्यसैको शिलशिला हो यो । तर, नेपाली टोलीले खेल्ने तरिकामा भने परिवर्तन आएकै हो । 

त्यसैको रिजल्ट हो नेपाली टोलीले इराक जस्तो बलियो टोलीसँग दुई गोल गर्न सक्नु र चाइनिज ताइपेईसँग बलियो पकड जमाउन सक्नु । नेपाल  इराकसँग ६–२ गोल अन्तरले पराजित हुन पुग्यो । नेपालले यो नतिजा ल्याएको दोस्रो दिन नै सन् २०२२ को विश्वकप फुटबल र २०२३ को एसियाकप फुटबलका लागि दोस्रो चरणको छनोट खेलमा चाइनिज ताइपेइविरुद्ध २–० गोलको जित निकाल्न सफल भयो । 

नेपाली टोलीको लामो समयपछि आएको यस्तो खालको प्रदर्शनको मुख्य श्रेय प्रशिक्षक आल्मुताइरीलाई नै जान्छ । 

विश्वकप छनोट अन्तर्गत नै तुलनात्मक रुपमा जोर्डन नेपालभन्दा बलियो टोली हो । नेपाली टोलीका मुख्य प्रशिक्षक अब्दुल्लाह अलमुताइरीले जोर्डनविरुद्धको खेलमा नेपालको लक्ष्य स्पष्ट जित भएको बताएका छन् ।

उनले नेपाली टोलीले पछिल्लो समय गरिरहेको प्रदर्शनका आधारमा नै नेपाललाई कमजोर आँक्न नमिल्ने बताए । यता, जोडर्नका प्रशिक्षक भिटल ब्रोकेल मान्सले नेपाली टोलीको प्रदर्शन पहिलाभन्दा धेरै परिवर्तन भएको बताएका छन् । 

नेपाललाई आफूहरुले पहिलेको जस्तो टोलीको रुपमा नलिएको र नेपालको प्रदर्शन पनि उत्कृष्ट भएको उनले बताएका छन् । 

यता, नेपालका प्रशिक्षक अल्मुताइरीले प्रि–म्याच कन्फ्रेन्समा नेपाल जोर्डनविरुद्ध उच्च मनोबलका साथ जितका लागि मैदानमा उत्रने बताए । नेपालले विश्वकप छनोटअन्तर्गत आज जोर्डनसँग खेल्दै छ । नेपाल र जोर्डनको खेल नेपाली समयानुसार राति ९ः४५ बजे सुरु हुनेछ ।

“जोर्डन बलियो टोली हो । हामीलाई अन्डरडग भनेका छन् । जोसँग जोर्डनविरुद्ध कुनै मौका नै छैन । तर, हरेक खेल शून्यबाट सुरु हुन्छ । नतिजा मैदानमा गरिने प्रदर्शनमा निर्भर रहन्छ । सबै मैदानमा नै देखिनेछ,” अलमुताइरीले भने ।

प्रशिक्षक अल्मुताइरीले टिममा धेरै खेलाडी परिवर्तन पनि गरेका छन् । नेपालको फेरिएको आक्रमक फुटबल हेर्नलायक छ । अलमुताइरीले नेपालको लक्ष्य एसिया कपमा छनोट हुने रहेको बताए । उनले एसिया कपमा छनोट हुनका लागि जोर्डनलाई हराउन आवश्यक रहेको बताए । “हाम्रो लक्ष्य एसियन कपमा छनोट हुनु हो । त्यसका लागि हामीलाई जोर्डनविरुद्ध जित चाहिन्छ । त्यसका लागि हामीले राम्रो तयारी पनि गरेका छौँ,” उनले भने ।

विश्वकप छनोटको पहिलो लेगको खेलमा जोर्डनले नेपाललाई ३–० ले हराएको थियो ।

नेपालले जोर्डनविरुद्ध हालसम्म तीन खेल खेलेको छ । तर, नेपालको नतिजा सुखद छैन । नेपालले जोर्डनविरुद्ध दुई खेल गुमाएको छ । एक खेल भने बराबरी खेलेको छ ।

विश्वकप छनोट अन्तर्गत नै नेपालले सन् २०११ को जुलाईमा जोर्डनसँग खेलेको थियो । जोर्डनको मैदानमा भएको खेलमा नेपाल ९–० ले पराजित भएको थियो ।

त्यसपछि नेपालले घरेलु मैदानमा २०११ को जुलाई २८ मा नेपालमा भएको खेलमा नेपालले जोर्डनलाई १–१ गोलको बराबरीमा नतिजा हात पारेको थियो । दशरथ रंगशालामा नेपालका लागि भरत खवासले गोल गरेका थिए । पछिल्लो पटक नेपालले जोर्डनसँग २०१९ को अक्टोबरमा खेलेको थियो ।

विश्वकप छनोट अन्तर्गत नै नेपालले जोर्डनसँग उसैको मैदानमा खेलेको थियो । उक्त खेलमा नेपाल ३–० ले पराजित भएको थियो ।

छनोटको समूह ‘बी’ मा रहेको नेपालले ६ खेलमा ६ अंक जोडेको छ । नेपाल तालिकाको चौथो स्थानमा छ । जोर्डन ५ खेलमा १० अंक जोडेर तेस्रो स्थानमा छ ।

नेपालले विश्वकप छनोटको तेस्रो चरणमा पुग्ने मौका गुमाइसकेको छ । तर, नेपाललाई बाँकी खेलमा जित निकाल्दै एसियन कप छनोटको तेस्रो चरणमा स्थान बनाउने अवसर रहेको छ ।