जनकपुरधाम । गएको वैशाख २६ गते भेन्टिलेटर अभावमा जनकपुरधाममा एकजना कोरोना संक्रमितको मृत्यु भयो । मधेस स्वास्थ्य विज्ञान प्रतिष्ठानअन्तर्गतको प्रदेशिक अस्पतालमा उपचार्थ जलेश्वर नगरपालिका–४ का ५५ वर्षीय सुखिचन महतोको भेन्टिलेटर अभावमा मृत्यु भएको थियो ।

वैशाख ३० गते महोत्तरी गाउँपालिका–४ का ४२ वर्षीय रघुनाथ पाण्डेयलाई श्वासप्रश्वासमा समस्या आएपछि जलेश्वर अस्पतालमा भर्ना गरियो । स्वास्थ्य अवस्था बिग्रिँदै गएपछि अस्पतालले उनलाई भेन्टिलेटरमा राख्नुपर्ने भन्दै प्रादेशिक अस्पताल जनकपुर रेफर गर्याे । जनकपुर लैजाँदै गर्दा बाटोमै उनको मृत्यु भएको पाण्डेयका आफन्त वैभव चौधरीले जानकारी दिए ।

प्रदेश–२ का अस्पतालमा कतै आईसीयू र भेन्टिलेटर नहुँदा बिरामीको मृत्यु भइरहेको छ भने कतै भएका उपकरण सञ्चालनमा ल्याउन नसक्दा बिरामीले ज्यान गुमाएका छन् ।

प्रदेश सरकारले गत वर्ष वैशाख ७ गते ५० वटा भेन्टिलेटर खरिद र कोभिड अस्पताल बनाउने निर्णय गरेको थियो । तर, अझै निर्णय कार्यान्वयन भएको छैन ।

प्रदेशिक अस्पताल जनकपुरका मेडिकल सुपरिटेन्डेन्ट प्रमोद यादवले प्रदेशिक अस्पतालमा भेन्टिलेटर नहुँदा धेरै संक्रमितलाई बाहिर रेफर गर्नुपरेको बताए ।

कोभिड अस्पताल पनि बनेन
गत वैशाख २० गते जनकपुरस्थित मणिपाल शिक्षण अस्पतालको भवनलाई कोभिड अस्पताल बनाउने निर्णय गरिएको थियो । अहिलेसम्म त्यसको प्रारम्भिक काम मात्र सुरु भएको छ ।

प्रदेश सरकारले निर्माण गर्न लागेको १०० बेड क्षमताको उक्त भवनलाई २० दिनभित्रै कोरोना विशेष अस्पतालको रुपमा प्रयोगमा ल्याउने गरी काम अगाडि बढाइएको बताइएको छ ।

हालसम्म अस्पताल वरपर घाँस उखेल्ने र सरसफाइ मात्र भएको छ । प्रदेश सरकारले मणिपाल शिक्षण अस्पतालको जीर्ण भवनलाई कोभिड अस्पतालको रुपमा विकास गर्ने जिम्मा मुख्यमन्त्री स्वच्छता अभियानका संयोजक एवं सिनियर डिभिजन इन्जिनियर भगवान झालाई दिएको छ ।

त्यहाँ २० आईसीयू बेडसहित १०० शययाको कोभिड अस्पताल सञ्चालनमा ल्याइने इन्जिनियर झाले जानकारी दिए । अस्पताल सञ्चालनका लागि अनलाइन टेन्डर प्रक्रिया पूरा भएको र जनशक्ति भर्ना प्रक्रिया अगाडि बढाइएको उनले बताए ।

जनशक्ति अभावमा थन्किए भेन्टिलेटर
जनशक्ति अभावले जिल्ला अस्पताल जलेश्वरको आईसीयू तथा भेन्टिलेटर थन्किएका छन् । आईसीयू र भेन्टिलेटर सञ्चालन नहुँदा त्यहाँबाट रेफर भएका बिरामीले ज्यानै गुमाएका छन् ।

एक वर्षअघि दुई करोड रुपैयाँ खर्चेर जडान गरिएको पाँचवटा भेन्टिलेटर सञ्चालनका लागि जनशक्ति पठाउन प्रदेश सरकारलाई बारम्बार तकेता गरे पनि अटेर गरेको अस्पताल व्यवस्थापन समितिका अध्यक्ष सुरेश पाण्डेय बताउँछन् ।

प्रदेश सरकारले केही स्वास्थ्यकर्मी पठाए पनि अति आवश्यक रहेको इन्टर्नल मेडिसिन, एमडी एनेस्थेसिया र रेडियोलोजिस्ट नपठाउँदा सेवा सञ्चालन गर्न नसकिएको उनले स्पष्ट पारे ।

प्रदेश सरकारले स्टाफ नर्स तथा मेडिकल अफिसर मात्रै पठाएको भन्दै अस्पताल रेफरल सेन्टरजस्तै भएको देख्दा आत्मग्लानि महसुस भएको उनको भनाइ छ ।