![निगमले मे १८ देखि २२ सम्म साउदी चार्टर्ड उडान गर्ने, भारतीय नागरिकलाई लैजाने](https://12khari.top/uploads/posts/Bimansthal1616990604.jpg)
काठमाडौं । नेपाल वायुसेवा निगमले यही मे १८ देखि २२ सम्म साउदी अरेबिया चार्टर्ड उडान गर्ने भएको छ । सरकारले काठमाडौंमा अड्किएका भारतीय नागरिकलाई साउदी लैजान निगमलाई सातवटा चार्टर्ड उडान गर्न अनुमति दिएको थियो ।
निगम प्रवक्ता करिश्मा श्रेष्ठले भारतीय नागरिकलाई साउदी लैजान पाँच दिनमा सातवटा उडान गर्ने तालिका सार्वजनिक गरिएको बताइन् । उनका अनुसार निगमले साउदी अरेबियाको रियाद पाँच र दमाम दुई उडान गर्नेछ । ती दुई गन्तव्यमा जान चाहने भारतीय नागरिकले निगमको कर्पाेरेट कार्यालयबाट टिकट काट्नुपर्नेछ ।
सरकारले नेपालस्थित भारतीय दूतावासको सिफारिस पाएका भारतीयलाई मात्रै साउदी लैजान भनेको छ ।
निगमले रियादका लागि प्रतिव्यक्ति ८९ हजार रूपैयाँ र दमामका लागि ८४ हजार ५०० रूपैयाँ शुल्क तोकेको छ ।
सरकारले नेपालमा अड्किएका भारतीय नागरिकलाई साउदी अरेबिया लैजान नेपाल एयरलाइन्सलाई सात र हिमालय एयरलाइन्सलाई तीनवटा चार्टर्ड उडान गर्न अनुमति दिएको छ ।