दाङ । तुलसीपुरको स्याउली बजारमा एउटा कार भित्र तीन जना बालक मृत फेला परेकाे घटनाकाे अनुसन्धान गर्न प्रहरीले आइतबार कार धनी र चालकलाई पक्राउ गरेर मुद्दा चलाएको छ । घटना अनुसन्धानका लागि पक्राउ गरिएका कारधनी तुलसीपुर ६ का ३३ वर्षीय यादबप्रशाद गैरे र सोही ठाउँका ५७ वर्षीय चालक पदमबहादुर बस्नतेविरुद्ध प्रहरीले ज्यान मुद्दा चलाएको हाे । 

स्याउली बजारमा विगत तीन महिनादेखि पार्किङ गरेर राखेको इन्डियन नम्बर प्लेटको एउटा कारभित्र शनिबार बेलुकी तुलसीपुर ६ बरुवा गाउँ निवासी ९ वर्ष मुनिका तीन जना बालकको शव फेला परेको थियो ।

इलाका प्रहरी कार्यालय तुलसीपुरका प्रमुख डीएसपी शिवबहादुर सिंहले गाडी धनि गैरे र चालक बस्नेतलाई पक्राउपछि ज्यान मुद्दा चलाएको जानकारी दिएका छन् । उनीहरूले गत माघ १ गते उक्त स्थानमा कार लक गरेर  पार्किङमा राखेको भन्ने बयान प्रहरीसमक्ष दिएकाे सिंहले बताए ।

"लक गरी राखेको कार भित्र तीन बालक कसरी भित्र छिर्न सके ? त्यहाँनेर आशंका छ," डीएसपी सिंहले भने, "माघदेखि पार्किङ गेरर राखिएको कारको बत्ती कसरी बल्यो ? भन्ने कुरापनि शंकास्पद देखिएको छ।"

धेरैले लामो समयदेखि पार्किङमा रहेकाे कारमा बेलुकीपख सबै बत्तीहरू बलेको देखेर स्थानीयले त्यहाँ हेर्न गएका थिए । स्थानीयले हेर्दा कारभित्र तीन बालकको शव देखेपछि प्रहरीलाई खबर गरेका थिए । त्यस्तै इन्डियन नम्बर प्लेटको कार लामो सयमदेखि पार्किङमा राखिएकाले कार चोरीको हुनसक्ने प्रहरीको आशंका छ ।

गैरेले आफूले इन्डियास्थित कानपुरको एक हस्पिटलमा काम गर्ने गरेको र त्यो कार साथीको भएको बताएका छन् । लकडाउनले गर्दा कार छोड्न जान नभ्याएको भन्ने बयान उनले प्रहरीसमक्ष गरेको प्रहरी अधिकारीले बताएका छन् । 

यसैबीच तीन बालकको शव पोस्मार्टमका लागि फरेन्सिक एक्सपर्ट चिकित्सककाे टाेली बुटबलबाट तुलसीपुर झिकाइएकाे छ । इप्रका तुलसीपुरका प्रमुख सिंहले तुलसीपुरमा फरेन्सिक एक्सपर्ट डाक्टर नभएको हुँदा शव पोस्मार्टमका लागि एक्सपर्ट बुटवलबाट झिकाउनु परेको जानकारी दिए । प्रहरीले बाँकेबाट घटना अनुसन्धान गर्न तालिमप्राप्त कुकुर र विज्ञ प्राविधिकसमेत झिकाएको थियो । बाँकी कुरा अनुसन्धान र पाेस्टमार्टम रिपोर्टपछि मात्रै थाहा हुने प्रहरीले बताएको छ ।