काठमाडौँ । नेपाल उद्योग वाणिज्य महासंघको पुँजीबजार फोरमले सेयर बजामा लगानीकर्ता र कारोबारी छुट्याएर पुँजीगत लाभकर लगाउन माग गरेको छ । फोरमले आगामी बजेटका लागि अर्थमन्त्री विष्णुप्रसाद पौडेलाई भेटेर दोस्रो बजारमा कारोबार गर्ने लगानीकर्तालाई दुई भागमा बाँडेर दिर्घकालीन र अल्पकालीन लगानीकर्तालाई फरक–फरक पुँजीगत लाभकरको व्यवस्था गर्न माग गरेको छ ।  

फोरमले कति अवधि सेयर होल्ड गर्नेलाई अल्पकालीन र दिर्घकालीन भन्ने भनेर लगानीकर्ताको अवधि नै तोकको छ । फोरमले १ वर्षभन्दा बढी समय सेयर होल्ड गर्नेलाई २ प्रतिशत र १ वर्षभन्दा छोटो समयको लागि कारोबार गर्ने (टे«डर) लाई ५ प्रतिशत पुँजीगत लाभकर गर्न माग गरेको छ । यस्तै फोरमले प्राकृतिक व्यक्तिको हकमा अहिलेको ५ प्रतिशत पुँजीगत लाभकरलाई अन्तिम कर मान्न माग गरेको छ ।

संस्थागत लगानीकर्तालाई धितोपत्र बजारमा आकर्षण गर्न संस्थाले कारोबार गरी प्राप्त गर्ने आयमा १५ प्रतिशत मात्रै आयकर लगाउन माग गरेको छ । फोरमले संस्थागत लगानीकर्ता र धितोपत्र व्यवसायीलाई अग्रिम ककरवापत १.५ प्रतिशत मात्रै कायम गर्न माग गरेको छ ।

यस्तै म्युचुअल फन्डलाई आयतकर ऐनअनुसार कर नलाग्नेमा समावेश गर्नुपर्ने, म्युचुअल फन्डमा १ लाख सम्म लगानी गर्ने लगानीकर्तालाई उक्त रकम करयोग्य आयबाट घटाउनुपर्ने माग फोरमको छ । सिस्टमेटिक इन्भेस्टमेन्ट प्लानमा लगानी गर्नेलाई  आयकरमा छुट दिने व्यवस्था गर्नुपर्ने पनि माग फोरमले अघि सारेको छ ।