काठमाडौं । सडकमानवमुक्त अभियान तामझाममै सीमित देखिएको छ । कोरोनाकालयता काठमाडौंका धार्मिक तथा पर्यटकीय क्षेत्रमा सडकमानव थपिएको देखिन्छ ।

प्रधानमन्त्री केपी शर्मा ओलीले  भाषणमा पटक–पटक भन्दै आएका छन्, ‘‘सडकमानवलाई व्यवस्थापन गर्ने जिम्मा सरकारकै हो । हिजोजस्तै सडकमानव अहिले छैनन् । भए पनि न्यूनरूपमा सडकमानव छन् ।  सहयोगापेक्षी मानव पनि छैनन् । भिख माग्दै हात थाप्ने मानिसहरू पनि छैनन् ।’’ 

तर, प्रधानमन्त्रीको बोली भाषणमै सीमित देखिएको छ ।

२०७६ वैशाखमा राष्ट्रिय योजना आयोगको पूर्ण बैठकमा प्रधानमन्त्री ओलीले भनेका थिए, ‘‘सडकमा माग्दै हात थापिरहेका मानिस भेट्टाइयो भने  तुरुन्त फोन गर्नुस् ।’’

तर, सडकमानवलाई सरकारले वास्ता नगरेको अभियन्ता बताउँछन् । ‘‘पशुपतिमा देखिने अधिकांश सडक बालबालिका अभिभावक गुमाएका हुन् । यिनीहरूलाई उचित शिक्षा–दीक्षा र आवासको खाँचो छ,’’ सामाजिक अभियन्ता अजय अधिकारी भन्छन् ।

कोरोनाकालमा व्यक्तिगतरुपमा करिब तीन हजारको हाराहारीमा सडकमानवलाई खाना र ओड्ने सिरक वितरण गरेको उनी बताउँछन् ।

काठमाडौं महानगरपालिकाले एक वर्षअघि धुमधामका साथ सहयोगापेक्षी सडकमानवमुक्त काठमाडौं महानगर घोषणा गरेको थियो । तर, त्यो पनि घोषणामै सीमित भएको छ ।

काठमाडौंका अधिकांश धार्मिक तथा पर्यटकीय स्थलमा सडकमानवको चाप बढ्दो छ । नवजीवन परोपकार समाजका संस्थापक अध्यक्ष दुर्गानाथ दाहालले बौद्ध, पशुपति, स्वयम्भू, रत्नपार्क, न्युरोडलगायत क्षेत्रमा सडकमानव धेरै भेटिने गरेको बताए ।

सरकारले मानवसेवा आश्रमको समन्वयमा यही पुस ७ गतेदेखि एकमहिने मेची–महाकाली सडकमानवमुक्त अभियान सञ्चालन गरेको छ ।

सहयोगापेक्षी (बेसहरा, अशक्त, असहाय, अनाथ, अभिभावकविहीन), सडकआश्रित मानवहरुको उद्धारको लागि मेची–महाकाली अभियान सुरु गरिएको जनाइएको छ ।

पछिल्लो समय काठमाडौंमा सडकमानव बढ्दै जानुको कारण खोजी भइरहेको छ ।

कोरोनाका कारण सडकमा आएका सडकमानवलाई व्यवस्थापन गर्न पहल थालिएको काठमाडौं महानगरपालिकाका प्रवक्ता ईश्वरमान डंगोल बताउँछन् ।