काठमाडौं । काठमाडौंको नक्सालस्थित नेपाल प्रहरीको मुख्यालयमा साउन ९ गतेयता विगतको जस्तो चहलपहल छैन । कोरोना भाइरसको संक्रमण बढेसँगै चहलपहल घटेको हो । विगतको तुलनामा प्रहरी महानिरीक्षकलाई भेट्नेहरुको संख्या पनि कम छ । साउन ९ गतेयता प्रहरी हेडक्‍वाटरमा निरन्तर कोरोनाका संक्रमित देखापर्न थालेका छन् ।

त्यो पनि सानो संख्यामा होइन । पछिल्लो दुई महिनामा प्रहरी मुख्यालयमा दैनिक दुई सय बढी सक्रिय संक्रमित छन् । कोरोनामुक्त भएर डिस्चार्ज हुनेहरु पनि छन् । तर २ सयभन्दा कम सक्रिय संक्रमित भने हुन सकेका छैनन् । बिहीबार (हिजो) सम्म प्रहरी मुख्यालयमा ५५८ जना सक्रिय संक्रमित छन् ।

हेडक्‍वाटरमै सामाजिक दूरी, मास्क, स्यानिटाइजरलगायतको प्रयोग अनिवार्य गरिएको छ । प्रहरी प्रवक्ता एसएसपी कुवेर कडायतका अनुसार कोरोना संक्रमणको जोखिमपछि सीमित कर्मचारीबाट मात्रै काम भइरहेको छ । अत्यावश्यक कामबाहेकलाई प्रवेशमा रोक लगाइएको छ ।

हालसम्म डिस्चार्ज हुनेहरुको संख्या जोड्ने हो भने आठ सय बढी प्रहरी हेडक्‍वाटरभित्रै संक्रमित भइसकेका छन् । देशभर पनि प्रहरीमा संक्रमितको संख्या बढ्दो छ । तर प्रशासनिक कामकाज बढी हुने मुख्यालयमै कोरोनाका सयौं संक्रमित भएपछि त्यसले कर्मचारीको मनोबलमा समेत प्रभाव पारेको छ ।

पछिल्लो दुई महिनायता प्रहरी प्रधान कार्यालय कोरोनाको ‘हटस्पट’ नै बन्‍न पुगेको छ ।

असार २५ मा सिन्धुपाल्चोकको जम्बु खोलामा बाढी र पहिरो गएको थियो । त्यतिबेला पहिरोमा हराएकाहरुको खोजी तथा उद्धारका लागि प्रहरी प्रधान कार्यालय, नक्सालले विपत् व्यवस्थापन शाखाका टोली खटायो । टोली उद्धारमा सक्रिय भयो । उद्धारपछि टोली काठमाडौं फर्कियो । 

फर्किएर आएकामध्ये तीनजना प्रहरीमा कोरोनासँग मिल्दोजुल्दो लक्षण देखिएपछि जाँच भयो । नेपाल प्रहरीको अस्पताल, महाराजगन्जमा परीक्षण गर्दा उनीहरुमा कोरोना संक्रमण पुष्टि भयो । साउन ९ मा पहिलोपटक प्रहरी प्रधान कार्यालयमा तीनजनामा कोरोना देखिएको थियो । त्यसपछि उनीहरुको कन्ट्याक ट्रेसिङ सुरु भयो । त्यहीबाट प्रहरी मुख्यालयमा कोरोना प्रवेश गरेको प्रहरी अधिकारीको दाबी छ । त्यसयता प्रहरी मुख्यालयको कोरोना नियन्त्रणमा आउन सकेको छैन ।

संक्रमित हुनेमा अधिकांश प्रहरी प्रधान कार्यालयको सवारी शाखा (एमटी), सञ्‍चार निर्देशनालयका प्रहरीदेखि कोभिड-१९ को व्यवस्थापन डेस्कमा खटिएका छन् । अहिले पनि विभिन्‍न समयमा उद्धारमा जानुपर्ने भएकाले उनीहरुबाट जोखिम बढेको प्रहरी अधिकारीको बुझाइ छ । संक्रमित प्रहरीको उपचार प्रहरीकै अस्पतालमा भइरहेको छ ।