काठमाडौं । नवोदित लेखक दुर्गा कार्कीको प्रथम कृति ‘कुमारी प्रश्नहरू’ सार्वजनिक भएको छ । पब्लिकेसन नेपालयले २०२० को पहिलो पुस्तकका रुपमा ‘कुमारी प्रश्नहरू’ सार्वजनिक गरेको हो ।
पुस्तकलाई नेपालयको कालिकास्थानस्थित 'आर' शालामा शुक्रबार आयोजित कार्यक्रममा बेलायती राजदूत निकोला पोलिट, पत्रकार अमित ढकाल र लेखकले संयुक्त रुपमा विमोचन गरेका हुन् ।
कार्यक्रममा राजदूत पोलिटले नेपाली साहित्यमा महिलाको बढ्दो सहभागिताले आफू उत्साहित भएको बताइन् । पोलिटले बेलायतको साहित्यिक इतिहासको स्मरण गराउँदै उसबेला उता पनि जर्ज एलिटजस्ता महिला लेखकले पुरुषका नाममा लेख्ने गरेको सन्दर्भ कोट्याइन् । उनले भनिन्, ‘‘महिलालाई महत्त्व साथ नहेरिए साहित्यको मैदान अनुभूति बेगरको मरुभूमि बन्नेछ ।’’ राजदूत पोलिटले आफ्नो मन्तव्य नेपालीमै व्यक्त गरेकी थिइन् ।
कार्यक्रममा कथाकार कार्कीको लेखकीय व्यक्तित्वबारे प्रकाश पार्दै पत्रकार ढकालले भने, ‘‘दुर्गाको लेखनीमा विशेष शैली छ जसमार्फत् उनले उठान गरेका हरेक विषयवस्तुले नवीन जीवन पाउँछन् । त्यही नवीनता र गुरुत्व उनको कथा संग्रहमा पनि छर्लङ्ग देखिन्छ ।’’
‘‘लेख्नु भनेको लेखाइमार्फत् अरुलाई बुझ्नु पनि हो, त्येसैले यी कथा लेख्दा मैले धेरै मान्छेका भावनालाई महसुस गर्ने मौका पाएकी छु । त्यसरी नै पात्रका भावनाहरुमार्फत समाजका विविध पक्षलाई केलाउने मौका पनि पाएकी छु,’’ पुस्तकबारे लेखक कार्कीले भनिन्, ‘‘म आख्यान र गैरआख्यान दुवै विधामा लेख्न रुचाउँछु तर आख्यान लेख्दा वैचारिक आग्रह नथोपरियोस् भन्नेमा सचेत रहन्छु ।’’
कार्यक्रमको अन्त्यमा नेपालय पब्लिकेसनकी सम्पादक भूषिता वशिष्ठले प्रकाशित पुस्तकको सेरोफेरोमा रहेर लेखकसँग अन्तरसंवाद गरेकी थिइन् । संवादले पुस्तकको भाषा, शिल्प, शैली र विधाबारे प्रकाश पार्दै लेखकीय चुनौतीको विषयलाई समेटेको थियो ।
पुस्तक सार्वजनिक भएसँगै दुर्गा कार्कीको ‘कुमारी प्रश्नहरू’ नेपालका अधिकांश विक्रेताका साथै एमेजन डटकममार्फत् संसारभर उपलब्ध हुने जनाइएको छ । सार्वजनिक पुस्तक ‘कुमारी प्रश्नहरू’ को मूल्य ४२५ रुपैयाँ तोकिएको छ ।