चितवन।  ईच्छाकामना गाउँपालिका वडा नम्बर २ मा कम्युनिस्टहरूले वडा कार्यालय सार्न खोज्दा स्थानीयले विरोध गरी वडाध्यक्ष र पार्टी वडाध्यक्षलाई कालोमोसो लगाएको घटनामा स्थानीय कांग्रेस नेतालाई आरोप लगाएपछि कांग्रेस चितवनको गम्भीर ध्यानाकर्षण भएको जनाएको छ ।

उक्त घटनाको बिषयमा कांग्रेस नेतालाई झुटा आरोप लगाई पक्राउ गरेको विरोधमा विना सर्त रिहाईको माग गरिएको छ ।  नेपाली कांग्रेस चितवनका सभापति जीतनारायण श्रेष्ठद्वारा आइतबार जारी विज्ञप्तिमा उत्पन्न परिस्थितिको स्वयं सत्तारुढ दल र स्थानीय प्रहरी प्रशासन जिम्मेवारी हुने चेतावनी दिइएको छ ।

विज्ञप्तिमा, "वडा नम्बर २ को कार्यालयमा विगतमा विवाद हुदै आइरहेको र हिजो विदाको दिनमा राती ९ बजे कार्यालय सार्ने क्रममा स्थानीय स्थानीय जनसरोकारका विषयलाई बेवास्ता गरी स्थानीयले वडा अध्यक्ष पञ्चबहादुर चेपाङ र नेकपाका वडा पार्टी कमिटीका अध्यक्ष प्रकाश बुढाथोकीलाई स्थानीयले कालोमोसो दलेको बिषयलाई राजनीतिकरण गर्न खोजिएको"   उल्लेख छ ।

"यस विषयमा पार्टीका सक्रिय स्थानीय नेताको नाम जोडेर नेपाल कम्युनिष्ट पार्टीले विज्ञप्ति प्रकाशित गरी वडा अध्यक्षको गलत कार्यको प्रोत्साहन गरेको प्रति कांग्रेस घोर आपत्ति प्रकट गर्दछ," विज्ञप्तीमा लेखिएको छ । 

नेपाली कांग्रेसका नेताद्वय उत्तर बहादुर गुरुङ र विर्ख बहादुर गुरुङलाई झुटा आरोप लगाएर पक्राउ गरेको भन्दै कांग्रेस चितवनले अविलम्ब रिहाईको माग गरेको छ । 

घटनाको विषयमा नेकपाले यसअघि विज्ञप्ति जारी गरी पक्राउ गरेर कारवाही हुनुपर्ने माग राखेको थियो । उक्त घटनामा स्थानीय कांँग्रेस  नेता निर्दोष रहेको भन्दै  कांग्रेसले नेकपाको विज्ञप्तीको खण्डन गरी विज्ञप्ती जारी गरेको हो ।