काठमाडौं । साढे तीन वर्षदेखि आईसीसीको निलम्बनमा रहेको नेपाल क्रिकेट संघ (क्यान)को निर्वाचन यसै साता हुँदैछ । राजधानीमा शुक्रबार र शनिबार क्यानको साधारणसभासँगै चुनाव हुने कार्यक्रम छ । 
आईसीसीका पदाधिकारी र राष्ट्रिय खेलकुद परिषद्का सदस्यसचिव रमेश सिलवालसहितको छलफलपछि अघिल्लो साता तय गरिएको निर्वाचनमा पूर्वअध्यक्ष विनयराज पाण्डे र चतुरबहादुर चन्द अध्यक्षका लागि प्रतिस्पर्धा गर्दैछन् । 

दुवै पक्षको चुनावी एजेण्डा क्यानमाथिको निलम्बन फुकुवामा नै केन्द्रित छ । अन्तर्राष्ट्रिय क्रिकेट काउन्सिल (आईसीसी)को बोर्ड बैठक असोज २६ गते बस्दैछ । लामो समयदेखिको निलम्बन यसै बैठकबाट फुकुवा हुने अपेक्षा गरिएको छ । आईसीसीकै मापदण्ड अनुसार निर्वाचन सम्पन्न भए क्यानमाथिको निर्वाचन फुकुवा हुने प्रबल सम्भावना छ । 

त्यसकारण यतिबेला दुवै पक्ष चुनावी मैदानमा भिड्ने दौडधुपमा छन् । क्यानको कामकारबाहीको अनुभव सम्हालिसकेका दुवै नयाँ ढंगले अघि बढ्न दाबीसहित उम्मेदवारी दिएको बताउँछन् । 

सन् २००६ मा क्यानको अध्यक्ष भइसकेका विजयराज पाण्डे फेरि क्यानलाई सही ढंगले अगाडि बढाउने योजनासहित चुनावमा भिड्न लागेको बताउँछन् । उनी भन्छन्, “मैले जति भोट ल्याए पनि लड्ने पक्का हो । भलै चतुरबहादुरले जित्नुहोला तर मेरो उम्मेदवारी क्रिकेटको विकासका लागि हो ।” 

विनयराज क्यानको अध्यक्षमा आफू कुनै स्वार्थका लागि नभई विशुद्ध क्रिकेटको विकास लागि जान लागेको दाबी गर्छन् । “४० वर्ष महासचिव, अध्यक्ष भई बसेको ठाउँमा म फेरि किन जानुपर्ने ? एउटै कारण– भत्किएको क्रिकेट बनाउने हो,” उनले थपे, “मेरो पक्षमा समर्थन कम होला । तर अनुभव बढी छ ।”

पाण्डे अध्यक्ष हुँदा उपाध्याक्ष रहेका चन्द धरासायी क्रिकेटलाई उचाइमा पुर्याउने योजनासहित उम्मेदवारी पक्का गरेको बताउँछन् । २०७२ सालमा निर्वाचित भए पनि छोटो समयमै क्यान निलम्बनमा परेपछि कामकारबाही अपेक्षाकृत गर्न नसकेका चन्द ४–५ वर्षमा धरासायी बनेको नेपाली क्रिकेटलाई उचाइमा पुर्याउने दाबी गर्छन् । उनी भन्छन्, “नेपाली क्रिकेटको अवस्था खस्किएको छ । मेरो नेतृत्व आयो भने क्रिकेटका गतिविधिमा पुनरागमन हुनेछ ।” 

नेपाली क्रिकेटलाई तल्लो तहबाटै विकास गर्ने दाबी गरेका चन्दले भने, “अहिलेको अवस्थामा ग्रासरुट त कहाँ लगभग क्रिकेट मरेको अवस्थामा छ । निर्वाचित भए नयाँ ढंगले अघि बढ्नेछु ।” 

शनिबार हुने निर्वाचनमा अध्यक्षसहित १७ सदस्यीय नयाँ नेतृत्वका लागि ५९ जनाले मतदान गर्नेछन् । ३९ जिल्लाका प्रतिनिधि र बाँकी २० प्रदेशका प्रतिनिधिले भोट गर्न पाउँछन् । निर्वाचनबाट अध्यक्ष, उपाध्यक्ष, सचिव, कोषाध्यक्षसहित १७ सदस्य चुनिनेछन् । १७ मध्ये एक महिला हुनुपर्ने विधानमा उल्लेख छ ।