काठमाडौं । घरेलु मैदानमा अन्तर्राष्ट्रिय प्रतियोगिता खेल्ने हरेक खेलाडीको सपना हुन्छ । किनकी घरेलु मैदान र दर्शकले खेलाडीलाई थप उचाइमा पुर्याउन मद्दत गर्छ ।  प्रतियोगिता आफ्नै मैदानमा भएको अवसर पारी कतिपय खेलाडीले त कीर्तिमान कायम गरेका छन् । कतिपय त्यही पर्खाइमा हुन्छन् । 

सोमबारबाट घरेलु मैदानमा पाँचौं एभिसी सेन्ट्रल जोन भलिबल चल्दैछ । यसैपनि भलिबल राष्ट्रिय खेल भएका कारण चर्चा धेरै छ । पहिलो पटक अन्तर्राष्ट्रिय भलिबल आयोजना गर्ने अवसर पाएको नेपाल पनि घरेलु मैदानमा कीर्तिमानी नतिजा ल्याउने योजनाका साथ रहँदा खेलाडी प्रतियोगिताका लागि उत्साहित छन् । 

विगत चार वर्षदेखि सोहि टोलीमा मुख्य खेलाडीको रुपमा रहेका एक सदस्यको भने वर्षौंदेखिको सपनाले पूर्णता पाउन सकेन । उनी हुन्, मानबहादुर श्रेष्ठ । नेपाली भलिबलका मुख्य सदस्यका रुपमा रहेका उनी आठौं राष्ट्रिय खेलकुदमा सहभागिता नजनाएकै कारण पाँचौं संस्करणको एभिसी भलिबल च्याम्पियनसिप खेल्न पाएनन् । 

घरेलु मैदानमा देशका लागि खेल्ने सपनाबाट विमुख भए उनी । आइतबार घरेलु टोलीले किर्गिस्तानसँग खेल्दै सेन्ट्रल जोन भलिबलको यात्रा सुरुआत गर्दा मानबहादुर भने बिच भलिबलको तयारीमा छन् । बिच भलिबल उनको रहर भने होइन । घरेलु मैदानमा प्रदर्शन गर्न नपाउँदा उनी बिच भलिबलको तयारीमा लागेका हुन् । उनी राम्रो प्रदर्शन हुँदाहुँदै पनि राष्ट्रिय टोलीबाट बाहिर बस्न बाध्य भए । त्यसो त त्यो उनको कमजोरी हो । उनले छनोटका रुपमा लिइएको आठौं राष्ट्रिय खेलकुदमा सहभागिता जनाएका थिएनन् । 

भलिबल संघ र आफू आबद्ध क्लब त्रिभुवन आर्मीलाई जानकारी दिएर नै उनी भलिबल खेल्न जापान गएका थिए । तर बीचमा आइपुगेका उनलाई आर्मीले विभागीय कारबाही गर्दै टोलीमा समावेश नगर्दा उनी घरेलु मैदानमा ठूलो प्रतियोगिता खेल्नबाट वञ्चित भए ।  विभागीय कारबाही स्वीकार गरेका मानबहादुर राखेपको गल्तिका कारण नै यसो भएको बताउँछन् । उनले भने, “चैतमा राष्ट्रिय खेलकुद गर्ने कुरा भएपछि मैले जापानमा सम्झौता गरेको थिएँ । तर पछि वैशाखमा सारियो । तर पनि म संघ र आफ्नो क्लबसँग कुरा गरेरै गएको हुँ ।”

घरेलु मैदानमा खेल्न नपाएको भन्दा पनि उनलाई यसअघि भलिबलमार्फत् पुर्याएको योगदान कदर नगरेकोमा दुःख छ । “खेल्न लेखेको रहेनछ त्यो मान्छु । गल्ती पनि गरेको मान्छु । तर मैले यसअघि गरेको प्रदर्शन मूल्याङ्कन नगरेकोमा निकै दुःखी छु,” मानबहादुरले भने, “सन्दीप लामिछानेले क्रिकेटबाट देशविदेशमा नेपाललाई चिनाइरहेको छ । विमल, किरण र रोहितले फुटबलमार्फत् चिनाइरहेका छन् । म भलिबलमार्फत् देशलाई चिनाउन गएको हो । तर अप्ठ्यारोमा पारियो ।”

टोलीमा नरहे पनि मानबहादुर टोलीका हरेक गतिविधिमा जानकार छन् । केहि दिनअघि नेपालले अफगानिस्तानसँग मैत्रीपूर्ण खेल खेल्दा उनी दर्शकदिर्घामा बसेर खेलाडीलाई हौस्याइरहेका थिए । नेपालले हार्दा मलिन मुद्रामा देखिएका उनी जितमा उत्साहि हुन्थे । नेपालले दुबै खेल जित्यो पनि । 
दर्शकदिर्घामा बसेर खेल हेर्दा बेग्लै महसुुस गरेका मानबहादुरले भने, “साथीहरु खेलेको हेर्दा त्यो ठाउँ सम्झन्छु । अनि मनमा निकै चोट महसुस हुन्छ । तर अप्ठ्यारोमा धेरै दुःखी र खुसीमा मात्तिनु हुँदैन भन्ने बुझेको छु ।”

कमजोरी सुधार्दै नेपालले खेल्न सके राम्रो नतिजा ल्याउने उनी बताउँछन् । “मलाई विश्वास छ, साथीहरुले राम्रो खेल्न सके पक्कै राम्रो नतिजा आउनेछ । तर अरु टोली बलिया छन् । त्यो हामीले भुल्न हुन्न,” उनले भने । उनी प्रतियोगिता अवधिभर खेलाडीलाई साथ दिन पनि आग्रह गर्छन् । मानबहादुरले भने, “अब मिलेसम्म सबै खेल हेर्नेछु । प्रत्यक्ष र अप्रत्यक्ष टोलीसँग टचमा नै छु । म भलिबल समर्थकलाई टोलीलाई हौसला प्रदान गर्न आग्रह पनि गर्छु ।”

२०५२ सालमा नवलपरासिमा जन्मिएका मानबहादुरले पहिलो अन्तर्रािष्ट्रय प्रतियोगिताका रुपमा पहिलो एभिसी सेन्ट्रल जोन भलिबल च्याम्पियनसिप नै खेलेका थिए । नेपालको झण्डा अंकित जर्सि लगाएर बंगलादेशमा सम्पन्न पहिलो एभिसी सेन्ट्रल भलिबलबाट मानबहादुरले डेब्यू गरेका थिए । त्यसपछि निरन्तर राष्ट्रिय टोलीमा रहेका मानबहादुरलाई घरेलु मैदानमा सेन्ट्रल जोन खेल्ने सपना थियो । उनी भन्छन्, “मनमा अप्ठ्यारो लागेको छ । मैले होम ग्राउन्डमा अन्तर्राष्ट्रिय प्रतियोगिता खेलेको नै छैन । तर अझै धेरै समय बाँकी छ । अहिले नभए अर्कोपल्ट अवश्य खेल्ने मौका आउनेछ ।”

उनले मंसिरमा आयोजना हुने १३ औं दक्षिण एसियाली खेलकुद (साग)मा सहभागिता नजनाउने बताएका छन् । “राखेप च्याम्पियनसिप गरेर सागका लागि टोलीमा राख्ने कुरा पनि छ तर म अब साग पनि खेल्दिन । आर्मीको विश्व बिच भलिबल च्याम्पियनसिप हुँदैछ । म त्यसैका लागि तयार हुँदैछु । पदक ल्याउने अपेक्षा छ । गर्व पनि लागेको छ एउटा अवसर गुमाए पनि आर्मीलाई प्रतिनिधित्व गर्दै ठूलो प्रतियोगिता खेल्न पाउँदै छु,” उनले भने । 

तस्बिरः सरिता खड्का