काठमाडौं । नेपाल हिपहप फाउन्डेसन तथा गोविन्द एजुकेसनले शनिबार काठमाडौंमा आयोजना गरेको ‘गोविन्द एजुकेसन नेपाल बिब्वाई सिटी ०१९ प्रतियोगिता’ भक्तपुर ‘डार्कनेस क्रु’का सदस्य बिब्वाई चुन्टुले जितेका छन् ।
प्रतियोगिता जितेसँगै डिसेम्बर ७ देखि ८ सम्म ताइवानमा हुने बिब्वाई विश्व च्याम्पियनसिप प्रतियोगिताका लागि नेपालबाट बिब्वाई चुन्टुका लागि बाटो खुलेको छ । शनिबार विभिन्न पाँच विधामा भएको प्रतियोगितामा कुल १३४ प्रतिस्पर्धी सहभागि रहेको आयोजकले जानकारी दिएको छ ।
गायिका समृद्धि राई, र्यापर निर्णय डिएन एसके, प्रोफेसर ट्रिक्सलगायत उपस्थित कार्यक्रममा ‘वान अन वान अल स्टायल’मा मुकेश ढकालले नगद २० हजार रुपैयाँसहित प्रमाणपत्र हात पारेका छन् । ‘वान अन वान अल स्टायल किड्स’ मा बिब्वाई आर्यन विजयी भएका छन् भने ‘वान अन वान अन्डिस्प्युटेड बी गर्ल’को उपाधि बि गर्ल फेथ द ब्याटल फ्युजन क्रु सदस्यले प्राप्त गरेकी छन् ।
यस्तै लेट्स ब्रेक क्रु ‘फो अन फो ब्रेकिङ’ उपाधि प्राप्त गर्न सफल भयो । प्रतियोगितामा विजयी आर्यन, बि गर्ल फेथ द ब्याटल फ्युजन क्रु सदस्यले १०-१० हजार र ब्रेक क्रुले नगद रु ३० हजार रुपैयाँ प्राप्त गरे ।
यस्तै प्रतियोगीतमा उत्कृष्ट प्रदर्शन गर्दै योजना धमलाले गोविन्द एजुकेसन राइजिङ स्टार अवार्ड प्राप्त गरिन् । सम्पूर्ण विजेतालाई गोविन्द एजुकेसनका कार्यकारी निर्देशक विज्ञान कँडेल तथा हेल्थ करियर्स इन्टरनेसनल अष्ट्रेलियाको नेपालका लागि बजार व्यवस्थापक धीरज सिंहले नगद र प्रमाणपत्र प्रदान गरेका छन् ।
कार्यक्रममा बोल्दै गोविन्द एजुकेसनका कार्यकारी निर्देशक कँडेलले युवाको क्षमतालाई विभिन्न तरिकाले बाहिर निकाल्न जरुरी रहेको धारणा व्यक्त गरे ।
-1749010126.jpg)
