काठमाडौं । नेपाली राष्ट्रिय महिला फुटबल टोलीका सावित्रा भण्डारी र अनिता बस्नेतको भारतीय लिग क्लब सेतु फुटबल क्लबसँगको सम्झौता अन्तिम चरणमा पुगेको छ । हस्ताक्षरलगायतका काम सकिएको र एपीएफले अखिल नेपाल फुटबल संघ ‘एन्फा’लाई पत्र पठाउने प्रक्रिया मात्र बाँकी रहेकोले प्रक्रिया अन्तिम चरणमा पुगेको जनाइएको छ । विभागीय क्लब एपीएफमा आबद्ध सावित्रा र अनिताले सम्झौतापत्रमा हस्ताक्षर गरिसकेका छन् । 

अब उनीहरु आबद्ध एपीएफले अखिल नेपाल फुटबल संघ (एन्फा) लाई पत्र पठाएपछि प्रक्रिया सकिने व्यवस्थापन गरिरहेका महिला टोलीका प्रशिक्षक हरि खड्काले जानकारी दिए । प्रशिक्षक खड्काका अनुसार करीब १ महिनासम्म चल्ने लिगका लागि सावित्रा ८० हजार भारतीय रुपैयाँ र अनिता ६५ हजार भारतीय रुपैयाँमा आबद्ध हुन लागेकी हुन् । उनीहरु आबद्ध हुने सेतु फुटबल क्लब गत सिजनको उपविजेता टोली हो । 

यस सिजनको लिग मे ५ बाट सुरु हुँदैछ । भारत तामिलनाडुको सेतु क्लबले उपाधि लक्ष्यसहित विदेशी खेलाडीको कोटामा नेपालकी सावित्रा र अनितालाई रोजेको हो । दुबै खेलाडीले सेतुसँगको सम्झौतापत्रमा हस्ताक्षर गरिसकेका छन् । हाल आठौं राष्ट्रिय खेलकुद प्रतियोगिताका लागि दाङ पुगेका साबित्रा र अनिताले लिगका लागि उत्साहित रहेको बताएकी छन् । एकसाताको घरेलु लिगमा चित्त बुझाइरहेका खेलाडी व्यवसायिक लिगका लागि आबद्ध हुन लागेको पहिलो पटक हो ।
 
यसअघि साबित्रा र अनिताले २०१६ र २०१७ मा माल्दिभ्समा फुटसल खेलेका थिए । साबित्रा र अनिता नेपाली राष्ट्रिय महिला फुटबल टोलीका महत्वपूर्ण सदस्य हुन् । साबित्रा स्ट्राइकर हुन् भने अनिता मिडफिल्डर हुन् ।
 
पाकिस्तानको इस्लामावादमा २०१४ मा भएको तेस्रो महिला साफ च्याम्पियनसिप फुटबलमा राष्ट्रिय टोलीमा एकैसाथ डेब्यु गरेका दुबै जना अब केही समयपछि भारतको राष्ट्रिय लिगमा देखिने भएका छन् । 

को हुन सावित्रा ?

अनु लामापछि नेपाली महिला फुटबलमा उदाएकी खेलाडी हुन् सावित्रा भण्डारी । तीव्र गति र गोलमेसिनका रुपमा परिचित सावित्रा 'साम्बा' उपनामबाट परिचित छन् । ९ नम्बरको जर्सीमा मैदानमा देखिने २२ वर्षीया सावित्राले २०१४ मा पाकिस्तानको इस्लामावादमा भएको तेस्रो संस्करणको साफबाट राष्ट्रिय टोलीमा डेब्यू गरेकी हुन् । 

अग्लो कद, ब्वाइज कट कपाल, चम्किलो अनुहार, हाँस्दा देखिने ठूला दाँत । साम्बाको हुलिया यति हो । तर दुई वर्षअघि भारतमा सम्पन्न चौंथो महिला साफ च्याम्पियनसिपले उनको परिचय एकाएक थप फराकिलो पारेको थियो ।

 
सर्वाधिक गोलकर्ता बनेपछि एकाएक चर्चामा आएकी साबित्रा हालै घरेलु मैदानमा सम्पन्न पाँचौं महिला साफ च्याम्पियनसिप फुटबलमा पनि सर्वाधिक गोलकर्ता बनिन् । उनी नेपाली महिला फुटबलमा सर्वाधिक गोल गर्ने खेलाडीको दोस्रो नम्बरमा छिन् ।
 
अनु लामा ३५ गोलसहित शीर्षस्थानमा रहँदा साबित्रा उनी नजिक छन् । २८ अन्तराष्ट्रिय गोल गरेकी सावित्राले पाँचौं साफमा ४ तथा त्यसअघि चौथो साफमा १२ गोल गरेकी थिइन् । दक्षिण एसियामा उत्कृष्ट स्ट्राइकरको पहिचान बनाएकी सावित्राले घरेलु प्रतियोगितामा एपीएफलाई जिताउन महत्वपूर्ण भूमिका निर्वाह गर्दै आएकी छन् । 

को हुन् अनिता बस्नेत ?

राष्ट्रिय टोलीमा ११ नम्बरको जर्सी लगाउने अनिता बस्नेत महिला टोलीका लागि भरपर्दो मिडफिल्डर हुन् । विगत पाँच वर्षदेखी राष्ट्रिय टोलीमा स्थान बनाइरहेकी अनिता पाँचौं महिला साफ च्याम्पियनसिपपछि थप चर्चामा आइन् । उनको चर्चाको कारण थियो - गोल सेलिब्रेसन । जुन हेर्न लायक थियो । 

सेमिफाइनलमा श्रीलंकाविरुद्ध गोल गर्दा यूभेन्ट्सका अर्जेन्टिनी स्टार पाउलो डेबालाको उनले सेलिब्रेसनको नक्कल गरेकी थिइन् । जुन निकै चर्चामा आएको थियो । तेह्रथुममा जन्मिएकी २४ वर्षीया अनिताले घरेलु लिगमा समेत उत्कृष्ट प्रदर्शन गर्दै आइरहेकी छन् ।
 
उनले पनि सन् २०१४ मा पाकिस्तानको इस्लामावादमा भएको तेस्रो संस्करणको साफ च्याम्पियनसिप राष्ट्रिय टिममा डेब्यू गरेकी हुन् । उनले २ अन्तर्राष्ट्रिय गोल गरेकी छन् । पाँचौं साफअघि भारतमा सम्पन्न भएको हिरो वुमन्स गोल्डकपमा १ गोल गरेकी अनिताले माल्दिभ्समा २०१६ र २०१७ फुटसल खेलेकी थिइन् ।