काठमाडौं । म्यानमारमा बुधबारबाट सुरू हुने ओलम्पिक छनोटको दोस्रो चरणमा नेपाली राष्ट्रिय महिला फुटबल टोली घरेलु टोली म्यानमारको सामना गर्दैछ । 

समुह ‘ए’ को पहिलो खेलमा बलियो प्रतिद्‍वन्द्वी म्यानमारको सामना गर्न लागेको नेपाल पहिलो चरणमा निकालेको नतिजालाई निरन्तरता दिने रणनितीमा छ । कात्तिकमा म्यानमारमै सम्पन्न भएको पहिलो चरणमा नेपालले म्यानमारविरुद्ध १-१ को बराबरी खेलेको थियो । तर फागुनमा हिरो वुमन्स गोल्डकपमा नेपालले म्यानमारसँग दुबै खेलमा हार व्यहोरेको थियो । हालै घरेलु मैदानमा साफ च्याम्पियनसिप फुटबलको फाइनलमा भारतसँग पराजय भोगेको नेपाल पीडा भुलाउने प्रयासमा छ ।
 
घरेलु मैदानमा भोगेको पराजयको पीडासहित म्यानमार पुगेको नेपाल सराकात्मक नतिजाको खोजीमा मैदान उत्रिने लक्ष्यमा छ । म्यानमारस्थित मन्डलार थिरी रंगशालामा खेल नेपाली समयअनुसार बेलुका ५:१५ बजे सुरू हुनेछ । 

छ महिनाको अवधिमा चौथो पटक आमने-सामने हुन लागेका दुबै टोली तेस्रो चरण प्रवेशको लक्ष्यमा छन् । समूहको शीर्ष स्थानमा रहने टोली अर्को चरण प्रवेश गर्ने भएकाले खेल दुबैका लागि महत्वपूर्ण छ । नेपालभन्दा बलियो म्यानमार घरेलु मैदानमा आक्रामक खेलको रणनीतीमा रहँदा नेपाल रक्षात्मक खेलमा केन्द्रित हुनेछ ।
 
म्यानमार जानुअघि प्रशिक्षक हरि खड्काले टोलीअनुसार रणनिती बनाउने बताएका थिए । उनले म्यानमार समूहमा बलियो रहेकाले रक्षात्मक खेल प्रदर्शन गर्ने बताएका थिए । नेपाल फिफा वरियतामा १ सय ३ औं स्थानमा छ भने म्यानमार ४४ औं स्थानमा छ ।
 
पछिल्लो समय नेपाल र म्यानमारबीच भारतमा सम्पन्न हिरो वुमन्स गोल्डकपमा प्रतिस्पर्धा भएको थियो । लिग चरणमा ३-० ले पराजित नेपालले फाइनलमा ३-१ को हार व्यहोरेको थियो । उक्त खेलमा नेपालका लागि मन्जली कुमारी योन्जनले गोल गरेकी थिइन् । समग्रमा यी दुई टोलीबीच पछिल्लो ६ महिनामा चौंथो पटक प्रतिस्पर्धा हुन लागेको हो ।
 
बुधबार म्यानमारसँग खेल्ने नेपालले शनिबार भारत र मंगलबार इन्डोनेसियाको सामना गर्नेछ । समूहको शीर्ष स्थानमा रहने टोलीले तेस्रो चरणमा स्थान बनाउनेछ । यसअघि भएको पहिलो चरणमा नेपालले म्यानमार, भारत र बंगलादेशसँग १-१ को बराबरी खेलेको थियो । 

नेपाली टोलीमा 

गोलकिपर : अन्जना रानामगर, एन्जिला तुम्बापो सुब्बा, उषा नाथ
 
डिफेन्डर : हिरा कुमारी भुजेल, गिता राना, पुनम जर्घामगर, अमृता जोशी, कविता धिमाल, पुजा रानामगर, मनमाया लिम्बु 

मिडफिल्ड : अनिता बस्नेत, दिपा राई, मन्जली कुमारी योन्जन, सर्मिला थापा, सरु लिम्बु, रेनुका नगरकोटी र अनिता केसी 

फर्वाडमा : रेखा पौडेल, निरु थापा र सावित्रा भण्डारी छन् ।