काठमाडौं । एन्जिला तुम्बापो सुब्बा नेपाली महिला फुटबल पछ्याउनेहरुका लागि यो नौलो नाम भने होइन् । महिला राष्ट्रिय फुटबल टिमकी नम्बर एक गोलरक्षक एन्जिला पछिल्लो समय नेपाली महिला फुटबलमा बेग्लै पहिचान बनाउन सफल छन् ।

उनले प्रदर्शन गरेका राष्ट्रिय तथा अन्तर्राष्ट्रिय खेलहरुमा एक नौलो छाप छोडेकी छन् । एन्जिलाले भर्खरै सम्पन्न पाँचौ साफ च्याम्पियनसिपमा पनि उत्कृष्ट प्रदर्शन गरिन् । विडम्बना नेपालले घरेलु मैदानमा भएको च्याम्पियनसिपको उपाधि भारतलाई सुम्पिनु पर्‍यो ।

योसँगै लामो समयदेखि घरेलु मैदानमा भारतलाई हराउँदै साफ च्याम्पियनसिपको उपाधि उचाल्ने नेपालको सपना अधुरो भयो । च्यम्पियनसिपको समूह चरणका खेलहरुदेखि उत्कृष्ट प्रदर्शन गर्दै आएकी एन्जिलाले भारतविरुद्धको फाइनल खेलमा पनि आफ्नो प्रदर्शनलाई कायम राखिन् । 

उनले नेपाललाई उपाधि भने दिलाउन सकिनन्, नेपाल फाइनल खेलमा भारतविरुद्ध ३-१ गोलले पराजित भयो । “पहिलो पटक घरेलु मैदनमा साफ च्याम्पियनसिप खेलेको थिएँ, घरेलु मैदान अनि हजारौँ घरेलु समर्थक मेरो लागि पहिलो अनुभव थियो”, एन्जिलाले बाह्रखरीसँग भनिन् । 

“राष्ट्रिय टोलीको सदस्य भएदेखिको पहिलो सपना थियो नेपाललाई साफ च्याम्पियन बनाउने । झनै घरेलु मैदानमा प्रतियोगिता हुँदा ठुलो आशा जागेको थियो । तर, सकिन सबै नेपालीलाई ‘सरी’”, उनले भनिन् । 

१३ वर्षको उमेरदेखि फुटबल खेल्न थालेकी एन्जिलाले एएफसी साफ यू-१४ को खेलबाट उत्कृष्ट प्रदर्शन गर्न सफल थिइन् । एन्जिलाले धनगढीमा भएको छैटौँ राष्ट्रिय खेलकुदमा भएको राम्रो प्रर्दशनबाटै विभागीय टिम एपीएफमा स्थान बनाउन सफल भएकी थिइन् । 

भारतको सिलगुडीमा भएको सागबाट राष्ट्रिय टोलीमा डेब्यू गरेकी एन्जिलाले हालसम्म राष्ट्रिय टोलीका लागि निकै उत्कृष्ट प्रदर्शन गर्दै आएकी छन् । साफ च्याम्पियनसिपका समूह चरणका खेलहरुमा उत्कृष्ट प्रदर्शन गर्न सफल एन्जिलाले फाइनल खेलमा पनि उत्कृष्ट प्रदर्शन गरिन् ।

खेल समयमा निकै नै चलाखीपूर्ण प्रदर्शन गर्ने एन्जिलाले नेपाली टोलीका लागि धेरै खेलमा जित दिलाउन सहयोग गरेकी छन् । पाचौँ सफमा नेपालले चार खेलमा जम्मा तीन गोल खाएकी एन्जिलाले समुह चरणमा भुटानविरुद्धको पहिलो खेलमा उत्कृष्ट प्रदर्शन गर्न सफल भइन् ।

त्यस्तै दोस्रो खेलमा पनि नेपालको उत्कृष्ट प्रदर्शन रहन गयो । तेस्रो खेलमा पनि तुलनात्मक रुपमा बलियो भनिएको बंगलादेशविरुद्ध नेपालले उत्कृष्ट प्रदर्शन गर्न सफल भयो । नेपालले सबै खेलहरुमा गरेका उत्कृष्ट प्रदर्शनपछि एन्जिलाको ठूलो योगदान छ । किनकी उनी खेलको मुख्य भूमिकामा थिइन् ।

तर, फाइनल खेलमा नेपालले गरेको प्रदर्शनलाई लिएर एन्जिला भने त्यति सन्तुष्ट छैनन् । नेपालले समूह चरण र क्वार्टरफाइनलजस्तै प्रदर्शन गर्न नसकेको एन्जिला स्वीकार्छिन् । "हामी साफ च्यम्पियनसिपका समूह चरण र क्वार्टरफाइनलका खेलहरुमा निकै उत्कृष्ट थियौं, त्यहि अनुसारको प्रदर्शन हामीले फाइनलमा गर्न सकेनौं”, एन्जिलाले भनिन् । 

तर, साफ च्याम्पियनसिपमा अन्य खेलमा भएको नेपालको प्रदर्शनलाई तुलना गर्ने हो भने फाइनल खेलमा नेपाल भारतभन्दा बलियो देखिएको थियो । “मेरो लागि अस्मिरणीय क्षण बनेको छ, पाँचौ साफ च्याम्पियनसिप । यदी नेपाललाई उपाधि दिलाउन सकेको भए झनै महत्वपूर्ण क्षण बन्ने थियो” एन्जिलाले पुनः साफलाई सम्झिइन् । 

एन्जिलाको अबको लक्ष्य भनेको ओलम्पिक छनोटको दोस्रो चरणमा उत्कृष्ट प्रदर्शन गर्ने रहेको छ । नेपालले दोस्रो चरणमा भारतसँग पनि खेल्ने भएकाले उक्त खेल नेपालका लागि थप महत्वपूर्ण मानिएको छ । 

नेपालले अप्रिल छ तारिखमा भारतसँग पहिलो खेल खेल्दैछ । महिला फुटबलका हरेका खेलहरुमा नेपालका लागि तगारो बनेको भारतलाई नेपालले हिरो गोल्डकपमा २-० गोलले पराजित गर्दै ऐतिहासीक जित निकालेको थियो । 

“नेपालका लागि सधैं उत्कृष्ट प्रदर्शन गर्ने योजना हुन्छ, संयोगबस कहिले पुरा हुँदैन् । आगामी प्रतियोगितामा नेपाललाई उच्च स्थनमा राख्ने प्रयास गर्नेछु”, एन्जिलाले भनिन् । नेपालले ओलम्पिक छनोटका खेलहरुमा पहिलो खेल छ तारिखमा भारतसँग खेल्दैछ । त्यस्तै अन्य खेलहरुमा नेपलले घरेलु टोली म्यानमार र इन्डोनेसियासँग खेल्नेछ ।