काठमाडौं । जापानको टोकियोमा २०२० मा हुने ओलम्पिक खेलकुदअन्तगर्त महिला फुटबलको दोस्रो चरण छनोट बुधबारदेखि म्यानमारमा सुरू हुँदैछ । पहिलो चरणमा शानदार प्रदर्शनसहित दोस्रो चरणमा स्थान बनाएको नेपालले त्यही लयलाई निरन्तरता दिने लक्ष्यमा म्यानमार पुगेको छ । घरेलु टोली म्यानमार, भारत र इन्डोनेसिया रहेको समूह ए मा नेपाल छ । 

तीन समूह रहेको दोस्रो चरणमा प्रत्येक टिमको शीर्षस्थानमा रहने टोली तेस्रो चरणमा पुग्नेछन् । नेपाल हालै घरेलु मैदानमा सम्पन्न पाँचौं महिला साफ च्याम्पियनसिपमा भएका कमजोरी सुधार्दै इतिहास बनाउने योजनामा छ । तर फिफा बरियतामा आफूभन्दामाथि रहेका टोलीमाथि नेपाललाई जित निकाल्न भने सहज छैन् । 

त्यहीभएर प्रशिक्षक हरि खड्काले टिमअनुसार टोलीको रणनीति बनाएका छन् । म्यानमारविरुद्ध रक्षात्मक योजना बनाएका खड्काले भारत र इन्डोनेसियामाथि फरक योजना बनाएको बताए । उनले भने, "पाँचौं महिला साफ च्याम्पियनसिपमा भोगेका पिडा भुलाउने प्रयास गर्नेछौं । हार मानेका छैनौं । म्यानमार समूहमा बलियो छ । त्यही भएर फरक टोलीसँग फरक रणनीतिमा खेल्नेछौं । राम्रो नतिजा ल्याउनेछौं ।’

"खेलाडीहरु निकै उत्साहित छन् । टिम पनि राम्रो छ । तयारी पनि छ । साफमा भएका कमजोरी अब विगत भइसके । हामी दोस्रो चरणका खेल्दैछौं । राम्रो नतिजाको पर्खाइमा हुनेछौं", प्रशिक्षक खड्काले थपे । पाँचौं पटक साफको उपाधि जितेको भारत लगत्तै म्यानमार पुग्दा नेपालले चार दिनमात्र तयारी गर्‍यो । 

हारको पीडाले लगत्तै अभ्यासका लागि खेलाडी मानसिक रुपमा तयार नभएकाले चार दिनमात्र अभ्यास गरेको प्रशिक्षक खड्काको भनाई छ । "घरेलु मैदानमा च्याम्पियन बन्ने लक्ष्य थियो । खेलाडीहरु जितको भोकमा थिए । त्यही अनुसारको मिहनेत गरेका थिए । हारपछि उत्पन्न पीडाका लागि खेलाडीलाई आराम दिइएको हो । हामीले त्यसअघि लामो तयारी गरेका छौं", प्रशिक्षक खड्काले भने । 

नेपाल चैत ८ गते साफ च्याम्पियनसिपको फाइनलमा भारतसँग पराजित भएको थियो । त्यसअघि भारतमा भएको हिरो वुमन्स गोल्डकपमा नेपालले भारत, म्यानमार र इरानसँग प्रतिस्पर्धा गरेको थियो । फिफा वरियतामा नेपालमाथि रहेको म्यानमारसँग हार तथा भारतसँग पहिलो पटक २-१ को जित निकालेको नेपाल साफमा भने पराजित भएको थियो ।
 
फेरि एकपटक आफूलाई प्रमाणित गर्ने मौका पाएको नेपाल भारतविरुद्धको जितलाई दोहोर्‍याउने पक्षमा छ । फुटबलमा कमीकमजोरी हुनु स्वभाविक भए पनि फेरि एकपटक जितका लागि टोली आँतुर रहेको कप्तान निरु थापाले बताइन् । टोली इखमा रहेकाले सकारात्मक नतिजाको पर्खाइमा रहेको निरुले बताइन् । उनले भनिन्, "सानो कमजोरीले हार्‍यौं । गल्ती भएका कुरालाई सच्चाउँदै खेल्नेछौं । कमजोरीबाट पाठ सिकेका छौं । 

साफमा सर्वाधिक गोलकर्ता सावित्रा भण्डारीले फेरि एकपटक नेपाली समथर्कलाई खुसी बनाउने सोचमा रहेको बताइन् । "साफको फाइनलमा पाएको अवसरलाई सदुपयोग गर्न नसक्दा हार्नु पर्‍यो । अब यस्तो कमजोरी हुन नदिने र जितका लागि कोशिस गर्नेछु । हाम्रो खेल कस्तो छ । देखाइसकेका छौं । कोशिस गर्नछौं । समर्थकको बिश्वास तोड्ने छैनौं।"

उनी साफमा ४ गोलसहित सर्वाधिक गोलकर्ता भएकी थिइन् । स्टाइकर साबित्रा २६ अन्तर्राष्ट्रिय गोलसहित सर्वाधिक गोल गर्ने महिला खेलाडीको दोस्रो नम्बरमा छन् । अनु लामा ३५ गोलसहित पहिलो स्थानमा छन् । अनुले राष्ट्रिय टोलीबाट नखेल्ने घोषणा गरीसकेकाले साबित्रा अनुको गोलनजिक छन् । 

नेपालले दोस्रो चरणको पहिलो खेल बुधबार घरेलु टोली म्यानमारसँग खेल्नेछ । शनिबार भारतसँग खेल्ने नेपालले समूहको अन्तिम खेल २६ गते मंगलबार इन्डोनेसियासँग खेल्नेछ । इन्डोनेसियासँग पहिलो पटक आमने-सामने हुने नेपालले म्यानमारसँग फागुनमा भारतमा सम्पन्न हिरो वुमन्स गोल्डकपमा प्रतिस्पर्धा गरेको थियो । यसअघि कात्तिकमा म्यानमारमा सम्‍पन्न पहिलो चरणमा नेपालले भारत, बंगलादेश र म्यानमासँग १-१ को बराबरी खेलेको थियो ।