विराटनगर । महिला साफ च्याम्पिनसिपमा नेपाली टोली सदाबहार दाबेदार टोलीका रुपमा परिचित छ । पछिल्ला चारमध्ये ३ संस्करणको फाइनल खेलको नेपाल यसपटक पुनः फाइनल पुग्ने बलियो सम्भावनाका बीच बुधबार श्रीलंकाविरुद्ध सेमिफाइनलमा उत्रँदैछ । 

घरेलु मैदानमा पहिलो पटक साफ च्याम्पियनसिपमा नेपालले लिग चरणका दुवै खेल जितेको थियो । यद्यपि नेपालले भुटानविरुद्ध पहिलो खेलमा जित दर्ता गर्दा गोलअन्तर भने अपेक्षा अनुसार बढाउन सकेन । बंगलादेशविरुद्धको दोस्रो खेलमा भने नेपाल पूरै लयमा देखिएको थियो । 

बंगलादेशविरुद्धको खेलको लयलाई कायम राख्ने र इतिहास हेर्ने हो भने श्रीलंका नेपालका लागि सहज प्रतिद्धन्द्धी हो । विराटनगरस्थित सहिद रंगशालामा नेपाल र श्रीलंकाबीचको खेल बुधबार बिहान ११ बजे सुरु हुँदा नेपाल सहजै अघि बढ्ने अनुमान छ । नेपाल र श्रीलंकाबीच साफ च्याम्पियनसिपमा दोस्रो पटक सेमिफाइल हुँदैछ ।

समग्रमा भने यी दुई टोलीबीच चौथो पटक प्रतिस्पर्धा हुन लागेको हो । सन् २०१२ मा घरेलु मैदानमा आयोजना भएको दोस्रो संस्करणको साफमा श्रीलंका नेपालसँग सेमिफाइनलमा पराजित भएको थियो । अनु लामा, दिपा अधिकारी र लक्ष्मी पौडेलले गोल गरेपछि श्रीलंकालाई ३–० लाई हराउँदै नेपाल अन्तिम दुईमा पुगेको थियो ।

त्यसपछिका दुई संस्करणमा भने नेपालले श्रीलंकासँग समूह चरणमै प्रतिस्पर्धा गरेको थियो । २०१४ मा  नेपालले  श्रीलंकालाई ३–० ले हराएको थियो । त्यसबेला नेपालका लागि पूर्व कप्तान अनु लामा र निरु थापाले समान १–१ गोल गरेका थिए । पछिल्लो पटक २०१६ मा भारतको सिलगुढीमा सम्पन्न चौथो संस्करणको साफ च्याम्पियनसिपमा यी दुई टोलीबीच प्रतिस्पर्धा हुँदा नेपाल १–० ले विजयी भएको थियो । नेपालको त्यो जितमा श्रीलंकाको आत्मघाती उपहार गोल पर्याप्त भयो । 

सात वर्षपछि यी दुई टोली सेमिफाइनलमा भिड्दैछन् । यति बेला पनि नेपाल उपाधि दाबेदार मध्येको एक हो भने श्रीलंका कमजोर प्रतिद्धन्द्धी । त्यहि कमजोरीमाथि फाइदा उठाउने लक्ष्यमा रहेको नेपाली टोलीका प्रशिक्षक हरि खड्का सेमिफाइनलका लागि टोली तयार रहेको बताउँछन् । सेमिफाइनलमा श्रीलंकाविरुद्ध खेल्नुअघि प्रशिक्षक खड्काले फाइनल पुग्न खेलाडीहरु मानसिक र शारीरिक रुपमा तयार रहेको बताए । 

विराटनगरमा जारी च्याम्पियनसिपको फाइनल प्रवेशका लागि आयोजक नेपाल भोलि बुधबार श्रीलंकाविरुद्ध खेल्दैछ । समूह ए को विजेता बन्दै सेमिफाइनलमा पुगेको नेपाल समूह बी को उपजिवेता श्रीलंकालाई पराजित गर्दै फाइनल पुग्ने लक्ष्यमा छ । 

तुलनात्मक रुपमा कमजोर मानिएको श्रीलंकामाथि प्रशिक्षक खड्काले आक्रामक खेल प्रदर्शन गर्ने योजना बनाएका छन् । तर प्रतिद्वन्द्वीलाई कमजोर रुपमा नलिई सतर्क रहनुपर्नेमा प्रशिक्षक खड्का सचेत छन् । उनले भने, “पहिलो लक्ष्य फाइनल पुग्नु हो र त्यसपछि उपाधि । त्यसलाई निरन्तरता दिन हामी श्रीलंकाविरुद्ध आक्रवमक खेल्नेछौं । भारतसँगको खेलमा श्रीलंका केही कमजोर देखियो । तर प्रतिद्धन्द्वीलाई कमजोर सम्झेर खेल्ने छैनौं ।”

समूहको अन्तिम खेलमा श्रीलंका साविक विजेता भारतसँग ५–० को गोलअन्तले पराजित भएको थियो । प्रशिक्षक खड्काले पराजितपछि कमजोर मनोबलमा रहेका खेलाडीमाथि फरक रणनीति अपनाउने बताए । “भारतसँगको खेलपछि कुन खेलाडीलाई रोक्नेबारे रणनीति बनाएका छौं । श्रीलंकाले काउन्टर र डिफेन्सिफ खेल्छ । त्यही डिफेन्सिफ सेभलाई तोड्न  प्रशिक्षणमा गरेको कुरालाई लागु गर्नेछौं,” प्रशिक्षक खड्काले भने । 

प्लेइङ सेटमा खासै परिवर्तन नहुने बताएका प्रशिक्षक खड्काले स्कोर धेरै भन्दा पनि राम्रो खेल प्रदर्शन गर्दै जित निकाल्नमा केन्द्रित रहने बताए । शारीरिक रुपमा बलिया श्रीलंकाका खेलाडीविरुद्ध त्यही अनुसार योजना बनाउने खड्काको भनाइ छ । 

टोली कप्तान निरु थापाले प्रतिद्वन्द्वीलाई कमजोर रुपमा नलिई सतर्क भएर खेल्ने बताएकी छन् । टिमले राम्रो प्रदर्शन गर्दै आइरहेको र सेमिफाइनलका लागि अझै मिहिनेत गर्ने उनले बताइन् । 

नेपाल र श्रीलंकाको खेलपछि बुधबार नै साफ च्याम्पियनसिपको सबै चार संस्कणको विजेता भारत र पछिल्लो पटक फाइनल खेलेको बंगालदेशबीच दोस्रो सेमिफाइनल खेल हुनेछ । फाइनल शनिबार हुनेछ ।