काठमाडौं । पाँच वर्षपछि सहिद स्मारक ‘ए’ डिभिजन लिग सुरु हुँदा चार महिनाअघि संकटा क्लबलाई कसैले पनि उपाधिको दाबेदारका रुपमा पत्याएका थिएनन् । काठमाडौंको मुटु टेबहालको क्लबले हदैसम्मको सफलता हासिल गरे अंकतालिकाको मध्यपंक्तिसम्म पुग्ने धेरैको अनुमान थियो । 

तर मंगलबार एन्फा कम्प्लेक्स र सशस्त्र प्रहरी बलको हल्चोक मैदानमा लिग सम्पन्न हुँदा संकटाको प्रभाव पूर्वानुमानजस्तो कमजोर रहेन । मनाङ मर्स्याङदी क्लबले उपाधिमा आठौं पटक कब्जा जमाउँदा संकटा क्लबले उपविजेताको स्थान सुरक्षित गर्यो । मनाङलाई उपाधिमा सबभन्दा नजिकबाट संकटाले नै चुनौती दियो । 

नेपाली फुटबलको शीर्ष डिभिजनको लिगमा १४ टोलीले राउन्ड रोबिन पद्धतिअनुसार प्रतिस्पर्धा गर्दा ९१ खेल भए । लिग अन्तिम चरणमा रहँदा ९१ खेलको समग्र मूल्यांकनमा कसले उत्कृष्ट प्रदर्शन गर्यो भनेर बाह्रखरीले सहभागी  क्लबका प्रशिक्षकलाई सोधेको थियो । १४ क्लबबाट सहभागी ३ सय ७१ खेलाडीमध्ये विभिन्न पोजिसनमा उत्कृष्ट प्रदर्शन गर्ने एक–एक खेलाडीको नाम सोध्दा उपविजेता टोलीका प्रशिक्षक सल्यान खड्गीले च्याम्पियन मनाङका ५ खेलाडीलाई रोजे । चार क्लबबाटै ११ खेलाडी रोज्ने क्रममा उनले आफ्नै क्लब संकटा, थ्री स्टार र त्रिभुवन आर्मीबाट दुई–दुई खेलाडीमाथि विश्वास राखे ।

तपार्इंको प्रशिक्षणमा यो लिगबाट ४–२–३–१ को संरचनामा पहिलो रोजाइको टिम बनाउनुपरे कस–कसलाई रोज्नुहुन्छ भनेर बाह्रखरीले सोध्दा संकटा प्रशिक्षक खड्गीले गोलकिपरमा मनाङका विशाल श्रेष्ठको नाम लिए । यसैगरी उनले दुई सेन्ट्रल रक्षकमध्ये एकमा आफ्नै टिमका तम्पी अरनेस्ट र मनाङका सुरज बिकलाई रोज्दा रक्षापंक्तिको बायाँ भागमा आफ्नै खेलाडी अमित तामाङ तथा दायाँपट्टी आर्मीका विकास खवासमाथि विश्वास देखाए ।

होल्डिङ मिडफिल्डमा आर्मीका सन्तोष तामाङ र थ्री स्टारका विक्रम लामाको जोडी रोजेका प्रशिक्षक खड्गीले विंग्सको दुवै भागमा मनाङका खेलाडी रोजे । वायाँ विंग्समा एडिलेजा सोमिडेलाई रोजेका उनले दायाँतिर अञ्जन विष्ट, आक्रामक मिडफिल्ड–फरवार्डमा थ्री स्टारका निराजन खड्का तथा मुख्य स्ट्राइकरमा मनाङका अफिज ओलावालेको नाम लिए । खड्गीको रोजाईमा परेका उत्कृष्ट ११ बाट गोलकिपर विशाल श्रेष्ठ एन्फाको उत्कृष्ट गोलकिपर तथा आर्मीका विकास खवास उदीयमान खेलाडीको पुरस्कार पाउन सफल भएका थिए ।