काठमाडौं । खेलाडी र मैदानबीचको सम्बन्ध नङ र मासुको जस्तै हुन्छ । खेलाडीबिना मैदानको के अर्थ, मैदान बिना खेलाडीको के अर्थ ? खेलाडी जन्मने मैदानबाटै हो । र खेलाडीले आफ्नो प्रतिभा निखार्ने, आफूलाई प्रमाणित गर्ने पनि मैदानमै हो । तर, नेपाली महिला क्रिकेट खेलाडीहरु त्यही मैदानबाट टाढा छन् । 

घरेलु क्रिकेटको संरचना नहुँदा महिलाहरुको प्रतिस्पर्धात्मक प्रतियोगिता नभएकै वर्षौं भइसक्यो । आक्कल झुक्कल हुने अन्तर्राष्ट्रिय प्रतियोगिताका लागि तयारी गर्ने बेलाबाहेक महिला क्रिकेट खेलाडीका लागि मैदान विरानो बन्छ । अहिले महिलाहरुलाई त्रिवि क्रिकेट मैदानमा अभ्यास गर्ने मौका जुरेको छ । उनीहरु कीर्तिपुरस्थित त्रिवि क्रिकेट मैदानमा २ वर्षपछि बन्द प्रशिक्षणमा फर्किएका हुन् । यो अवसर जुराइदिएको छ, आइसिसी महिला ट्वान्टी–२० बिश्वकप छनोट प्रतियोगिताले । 

२०७३ मंसिरमा विश्वकप छनोट खेलपछि पहिलो पटक महिला खेलाडी प्रशिक्षणमा जुटेका हुन् । प्रशिक्षक विनोद दासले उनीहरुलाई प्रशिक्षण दिइरहेका छन् । पुस ४ गतेबाट त्रिवि क्रिकेट मैदानमा प्रशिक्षण गराइरहेका दासले बिहान फिटनेश र दिउँसो अभ्यास गराइरहेका छन् । घरेलु संरचना र प्रतियोगिता नभए पनि खेलाडी अभ्यासमा गरेको प्रदर्शनबाट दास सन्तुष्ट छन् । तर अन्तर्राष्ट्रिय प्रतियोगिता खेल्नका लागि त्यो पर्याप्त नभएको प्रशिक्षक दासले बताए । 

“मुख्य समस्या फिटनेश हो । अहिले राम्रो भइरहेको छ । खेलाडीमा केही गर्नुपर्छ भन्ने भावना छ । सबै सकारात्मक छन् । त्यहि भएर तयारी राम्रो भइरहेको छ,” नेपाली राष्ट्रिय टोलीका पूर्व कप्तान रहेका प्रशिक्षक दासले भने, “प्रशिक्षकका हिसाबले म जति उत्साहित छु, त्यो भन्दा बढी खेलाडीहरु छन् । उनीहरुमा केही गरेर देखाउनुपर्छ भन्ने इख छ । जितको भोक छ । त्यो जितको भोक र इख उनीहरुको तयारीमा पनि देखिन्छ । आशा छ, हामी राम्रो गर्नेछौं ”

४३ खेलाडीबाट शुरु भएको बन्द प्रशिक्षणमा अहिले ३३ खेलाडी छन् । जति धेरै खेल्यो त्यति नै खेलाडीको प्रतिभामा निखार आउने हो । प्रशिक्षक दासले अहिले खेलाडीहरुलाई दुई टोलीमा विभाजन गरेर खेलाइरहेका छन् । बन्द प्रशिक्षणमा प्रशिक्षक दासले फिटनेससँगै खेलमा बढी ध्यान केन्द्रित गरेका छन् । पहिलो पटक महिला टोलीको जिम्मेवारी सम्हालेका दासले मुख्य लक्ष्य उत्कृष्ट प्रदर्शन गर्ने रहेको बताए । 

“पहिलो पटक यो टोली सम्हाल्ने मौका पाएको छु । खेलाडीमा भएको प्रतिभालाई नतिजामा बदल्नु पर्ने चुनौती छ । विश्वकप छनोट जस्तो प्रतियोगिता खेल्नका लागि तीन महिनाको तयारी पर्याप्त होइन । तर क्यान नभएको अवस्थामा आइसीसीले यो अवसर जुराइदिएको छ । पहिलो निश्चित समयमा मात्र अभ्यास हुन्थ्यो । तर, अहिले हामीले बिहानदेखि बेलुकीसम्म प्रशिक्षण गराइरहेका छौं । थाइल्याण्डमा हुने ट्वान्टी–२० प्रतियोगिताले हाम्रो कमजोरी पहिल्याउने मौका मिल्छ । त्यसले विश्वकप छनोट प्रतियोगितामा सहयोग पुग्नेछ ।”

फागुन ६ गतेबाट हुने विश्वकप छनोट प्रतियोगिता खेल्नु अघि नेपाली महिला टोलीले पुसको अन्तिम साता थाइल्यान्डमा हुने वुमन ट्वान्टी–२० स्म्यास क्रिकेट प्रतियोगिता खेल्नेछ । महिला टोलीकी कप्तान रुबिना क्षेत्रीले मुख्य लक्ष्य उपाधि भए पनि छोटो तयारीका कारण चुनौती रहेको बताइन् ।

“लामो समय अभ्यासमा फर्किएका छौं । तर जब मैदान प्रवेश गर्छौं, हामी सबैको लक्ष्य उपाधि जित्नु नै हुन्छ । तर छोटो तयारीले उपाधि जित्नु हाम्रो लागि चुनौती नै हो । तर हामी आफ्नो पक्षबाट सतप्रतिशत कोशिस गर्छौं,” कप्तान रुविनाले थपिन् “हामी प्रतियोगिता भएन भनेर चुप लागेर बस्दैनौं । आफैले टिम बनाएर उपलब्ध स्थानमा गएर क्रिकेट खेलिरहेका छौं । आफूलाई फिट राख्ने कोशिसमा हुन्छौं । सबैमा केही गर्नुपर्छ भन्ने इख छ । आशा गरौं रामै्र नतिजा आउँछ ।

बन्दसत्रमा आएका नयाँ बहिनीहरुले सिनियरलाई चुनौती दिइरहेका छन् । विशेषगरी सुदूर पश्चिमबाट आएका बहिनीहरुको प्रदर्शन निकै राम्रो छ । उनीहरुले भारत गएर क्रिकेट खेल्ने गरेका रहेछन् । त्यही भएर उनीहरुमा सम्भावना देखेको छु । फिल्डीङ र बलिङ ठिकै भए पनि ब्याटिङमा क्रमशः सुधार आइरहेको छ ।”

वुमन ट्वान्टी–२० स्म्यास
थाइल्यान्डमा हुने आइसीसी बिश्वकप छनोट प्रतियोगिता खेल्नुअघि नेपाली महिला टोलीले पुस अन्तिम साताबाट थाइल्याण्डमै वुमन ट्वान्टी–२० स्म्यास प्रतियोगिता खेल्नेछ । ट्वान्टी–२० स्म्यासमा आयोजक थाइल्याण्डसहित भुटान, हङकङ, इन्डोनेसिया, मलेसिया, तान्जानिया, श्रीलंका, कुवेत, नामिबिया र नेपालगरी १० टोली सहभागी हुन्छन् । प्रतियोगिताको पहिलो खेलमा नेपालले २८ गते तान्जानियासँग खेल्नेछ ।

३० गते नामिबियासँग खेल्ने नेपालले तेस्रो खेल माघ २ गते इन्डोनेसियाबिरुद्ध खेल्नेछ । चौथो खेलमा माघ ३ गते कुबेतसँग प्रतिस्पर्धा गर्नेछ । थाइल्याण्डमै आयोजना हुने बिश्वकपको छनोट तयारी स्वरुप थाइल्याण्डले प्रतियोगितामा आयोजना गरेको हो । 

महिला ट्वान्टी–२० विश्वकप छनोट प्रतियोगिता
थाइल्यान्डमै फागुन ६ गतेबाट हुने विश्वकप छनोट प्रतियोगितामा ७ टोली सहभागी हुँदैछन् । राउन्ड रोबिन लिगका आधारमा खेलाइने छनोट प्रतियोगितामा चीन, हङकङ, कुबेत, मलेशिया, युनाइटेड अरब इमिरेट्स (युएई), थाइल्याण्ड र नेपालले प्रतिस्पर्धा गर्नेछन् ।