काठमाडौं ।  अग्लो कद, ब्वाइज कट कपाल, चम्किलो अनुहार, हाँस्दा देखिने ठूला दाँत । साम्बा उपनामबाट परिचित सावित्रा भण्डारीको हुलिया यति हो । तर दुई वर्षअघि भारतमा सम्पन्न चौथो महिला साफ च्याम्पियनसिपले उनको परिचय एकाएक थप फराकिलो पा¥यो ।

सेमिफाइनलमा भारतसँग पराजित हुँदै बाहिरिँदा पहिलोपटक नेपाल महिला साफ च्याम्पियनसिपको फाइनल पुग्नबाट बञ्चित भयो । तर व्यक्तिगत रुपमा सावित्राले यही प्रतियोगिताबाट आफूलाई ‘गोल मसिन’ का रुपमा स्थापित गरिन् । उनको चर्चा एकाएक चुलियो । 

समूह चरणमा माल्दिभ्स, भुटान र श्रीलंकामाथि जित हासिल गरेर विजेताका रुपमा अगाडि बढेको नेपाल सेमिफाइनलमा भारतसँग ३–१ ले पराजित भएको थियो । यसअघिका सबै संस्करणमा पनि नेपाल फाइनलमा भारतसँगै पराजित भएको थियो । 

राष्ट्रिय टोलीलाई उपाधि जिताउने लक्ष्यमा पुग्न नसके पनि सावित्राले ठूलो व्यक्तिगत उपलब्धि हासिल गर्ने क्रममा भुटानमाथि ८–० को जित हासिल गर्दा एक्लै ६ गोल गरेकी थिइन् । दोहोरो ह्याट्रिकका साथ प्रतियोगिता सुरुआत गरेकी उनले त्यही लयलाई दोस्रो खेलमा पनि निरन्तरता दिइन् । माल्दिभ्सविरुद्धको दोस्रो खेलमा ९–० को जित हासिल गर्दा सावित्राको नाममा पाँच गोल थियो । सेमिफाइनलमा पराजित हुँदा पनि नेपालका तर्फबाट भएको एकमात्र सान्त्वना गोल उनैले गरेकी थिइन् । प्रतियोगितामा कुल १२ गोल गरेकी उनी उच्च गोलकर्ता बनेकी थिइन् । 

यतिबेला महिला फुटबल टोली पाँचौं साफ च्याम्पियनसिपको तयारीमा छ । पहिलोपटक महिला साफ च्याम्पियनसिप आयोजनाको अवसर पाउँदा अखिल नेपाल फुटबल संघले प्रतियोगिता विराटनगरमा गर्ने भएको छ । घरेलु मैदानमा पहिलो पटक क्षेत्रीय महिला फुटबलको सबभन्दा ठूलो प्रतियोगिता हुन लाग्दा सावित्रा अघिल्लो संस्करणकै जस्तो उच्च लय कायम राख्दै नयाँ कीर्तिमान बनाउने योजनामा छन् । 

२०१४ मा पाकिस्तानमा भएको तेस्रो महिला साफ च्याम्पियनसिपबाट राष्ट्रिय जर्सीमा ‘डेब्यु’ गरेकी उनी देशलाई पहिलो स्वर्ण पदक जिताउने लक्ष्यमा छिन् । सँगै अनु लामाको नाममा रहेको सर्वाधिक अन्तर्राष्ट्रिय गोलको कीर्तिमान तोड्नु पनि उनको लक्ष्य हुनेछ । अनुको नाममा ३५ अन्तर्राष्ट्रिय गोलको कीर्तिमान छ । त्यसमा सुधार गरेर आफ्नो नाममा कीर्तिमान लेखाउने उनको ठूलो रहर छ । त्यसका लागि सावित्रालाई १८ गोल आवस्यक छ । उनले अहिलेसम्म राष्ट्रिय टोलीको जर्सीमा १८ गोल गरेकी छिन् । 

साफ च्याम्पियनसिपको अघिल्लो संस्करणमा १२ गोल गरेकी सावित्राले मलेसियाविरुद्धको मैत्रीपूर्ण खेलमा २ गोल गरेकी थिइन् भने तेस्रो साफ च्याम्पियनसिपमा १ तथा दुई वर्षअघि भारतमा सम्पन्न १२औं दक्षिण एसियाली खेलकुद (साग) अन्तर्गतको फुटबलमा २ गोल गरेकी थिइन् ।

दुई महिनाअघि म्यानमारमा सम्पन्न ओलम्पिक छनोटको पहिलो चरण पार गर्दा आयोजक म्यानमारविरुद्ध उनले पेनाल्टीमा एक गोल गरेकी थिइन् । 

“अनु दिदीको कीर्तिमान तोड्न मन छ । दिदीसँगै धेरै कुरा सिकेकी छु । अहिले सँगै तयारीमा छौं । प्राविधिक रुपमा दिदीको खेल निक्कै अगाडी छ । उहाँ मेरा लागि गुरुजस्तै हुनुहुन्छ,” उनले भनिन् । 

एउटै क्लब (एपीएफ) बाट खेल्ने अनु र सावित्रा आपसमा निक्कै घनिष्ट छन् । सावित्राले थपिन् “मैले गोल गर्नैपर्छ भन्ने कुरालाई केन्द्रित गर्दै आफूलाई तयार गरिरहेकी छु । यसमा अनु दिदी र गुरुले निक्कै सहयोग गर्नुभएको छ । अहिले टोलीमा राम्रा खेलाडीहरुको उदय भएको छ । आफूलाई फर्ममै राख्नुपर्ने चुनौती छ । त्यसका लागि नियमित अभ्यास र खेल आवश्यक छ ।’

“पछिल्लो समय महिला फुटबलमा एन्फाको नेतृत्व केही उदार देखिएको छ । पुरुष टोलीजस्तै महिलालाई पनि स्तरीय खेलसामग्री उपलब्ध गराएको छ,” सावित्राले भनिन् “लगानी भए प्रतिफल आउने रैछ भन्ने कुरा ओलम्पिक छनोटको पहिलो चरणबाट प्रमाणित भएको छ ।” 

प्रशिक्षक हरी खड्का पनि साफ च्याम्पियनसिपमा सावित्रालाई आक्रमणको मुख्य हतियार बनाउने योजनामा छन् । “साम्बाको स्पिड निकै राम्रो छ । अरु खेलाडीले सहजै भेट्टाउन सक्दैनन् मैदानमा यो प्रतियोगिताको नायिका बन्न सक्छ । उसमा एशियाकै उत्कृष्ट स्ट्राइकर बन्ने गुण छ । नियमित अभ्यास र पर्याप्त एक्सपोजर आवश्यक छ,” उनले भनिन् ।