काठमाडौं । उपाधिविहिन यात्रामा पूर्णविराम लगाउने लक्ष्यसहित नेपाली राष्ट्रिय महिला फुटबल टोली पाँचौं महिला साफ च्याम्पीयनसिपको तयारीमा जुटेको छ । घरेलु मैदानमा पहिलो पटक महिला साफ च्याम्पियनसिप हुँदा उपाधि जित्नु टोलीको मुख्य लक्ष्य रहेको प्रशिक्षक हरि खड्का बताउँछन् । 

सहिद स्मारक ‘ए’ डिभिजन लिगको व्यस्तताका कारण अखिल नेपाल फुटबल संघ (एन्फा)ले महिला टोलीको तयारीका लागि त्रिहानको समय सातदोबाटोस्थित एन्फा कम्प्लेक्सको मैदान उपलब्ध गराएको छ । बिहानको झिसमिसेमै प्रशिक्षणमा जुट्ने खेलाडी जति उत्साहित छन्, त्यति नै निराश पनि । ओलम्पीक छनोटको पहिलो चरण पार गरिसकेको नेपाली टोलीलाई अहिलेसम्म एन्फा, राष्ट्रिय खेलकुद परिषद् वा युवा तथा खेलकुद मन्त्रालयजस्ता निकायबाट औपचारिक रुपमा बधाइसमेत नपाउँदा चेलीहरुको मन दुखेको छ ।

मौखिक रुपमा अभिभावक संस्था एन्फाले सम्मान गर्ने बताए पनि अहिलेसम्म केही गरेको छैन । खेल प्रशासनले आफ्नो ऐतिहासिक उपलब्धिलाई नजरअन्दाज गरेकोमा उनीहरुको जति चित्त दुखेको छ, त्यतिनै इख पनि पलाएको छ । त्यही इखले जगाएको उपाधि भोक यसपालि विराटनगरमा मेटाउने लक्ष्यसहित खेलाडीहरु शतप्रतिशत नतिजाका लागि मैदानमा पसिना बगाइरहेका छन् । 

‘पाएका अवसर उपयोगका लागि खेलाडीको मेहनत प्रशंसनीय छ,’ प्रशिक्षक खड्काले भने, ‘म कमजोर पक्षलाई सुधार्दै जितका लागि टिम तयार पार्ने कोसिसमा छु । बाँकी खेलाडीलाई उत्साहित बनाउने काम एन्फाको हो ।’ 

उनका अनुसार अहिले टोली आक्रमण तिखार्नमा केन्द्रित छ । विभागीय क्लब एपिएफ, आर्मी, पुलिस र दुई जिल्लाका गरी ३४ खेलाडी प्रशिक्षणमा छन् । ‘ठिक ३ महिनाको समय मिल्ने गरी तयारी सुरु गरेका छौं । अवसरसँगै धेरै चुनौती छन् । त्यसलाई चिर्न मैले कोसिस गर्ने हो,’ प्रशिक्षक खड्काले भने, ‘घरेलु मैदानको अनुभव छैन । खेलाडीलाई कसरी दर्शकको सामना गर्ने र मनोबल उच्च राख्ने जस्ता कुरा सिकाउँदै छु ।’ 

‘ओलम्पिक छनोट र प्रधान सेनापति महिला फुटबलपछि खेलाडी लयमा नै छन् । यसबीचमा खेलाडीलाई केही आराम दियौं । अब कमजोर पक्षलाई केन्द्रित गरी तयारी गरीरहेका छौं,’ खड्काले थपे, ‘ओलम्पिक छनोटको नतिजाले खेलाडी उत्साहित छन् । अहिले खेलाडीको मनोबल आकासिएको छ । केही मेहनत गरे जित्न सकिन्छ भन्ने छ ।’ कात्तिक अन्तिममा म्यानमारमा भएको ओलम्पिक छनोटको पहिलो चरणमा भारत र बंगलादेशसँगै बलियो मानिएको आयोजक म्यानमारविरुद्ध अपराजित रहँदै दोस्रो चरणको टिकट काटेको थियो । सफलताको त्यही लयलाई निरन्तरता दिने योजना बनाएको प्रशिक्षक खड्का बताउँछन् । 

दक्षिण एसियामा यसअघि नेपाली महिला टोलीका लागि भारतमात्र एक्लो प्रतिद्वन्द्वीका रुपमा रहँदै आएको थियो । तर पछिल्लो समय बंगलादेशले पनि महिला फुटबलमा उल्लेख्य सुधार गरेकाले सहज अवस्था नरहेको खड्काले बताए । पछिल्ला तीन संस्करणको फाइनलमा छिमेकी भारतलाई उपाधि सुम्पिएको नेपाल दुई वर्षअघि पछिल्लो पटक सेमिफाइनलमै भारतसँग पराजित भएको थियो । 

मैत्रीपूर्ण खेलको प्रस्ताव
महिला टोलीले साफ च्याम्पीयनसिपको तयारी दौरान केही मैत्रीपूर्ण खेलको अवसर मिलाइदिन एन्फासँग प्रस्ताव राखेको छ । फिलिपिन्स वा थाइल्याण्डमध्ये एउटासँग खेल्न पाए साफ च्याम्पियनसिपलाई सहयोग पुग्ने टिमको प्रस्ताव थियो । त्यसमा एन्फा अध्यक्ष कर्माछिरिङ शेर्पाले सकारात्मक प्रतिक्रिया दिएको प्रशिक्षक हरि खड्काले बताए । “म्यानमार जानुअघि चीनका क्लबविरुद्धका मैत्रीपूर्ण खेलले धेरै सुधार गर्ने मौका पाएका थियौं । अब साफ च्याम्पियनसिप अगाडि पनि त्यस्तै अभ्यास खेल खेल्न पाए सुधार गर्ने अवसर पाइन्थ्यो,’ उनले भने ।

साफ च्याम्पियनसिपको इतिहास 
इतिहास लामो नभए पनि महिला साफ च्याम्पियनसिप पाँचौं संस्करणको तयारीमा छ । नेपाली महिला टोलीका लागि साफ नै विश्वकप सरह रहँदै आएको छ । खेलाडी अनु लामाले भनिन्, ‘यही प्रतियोगिताले महिला खेलाडीको परिचय जोगाएको छ । २०१० मा बंगलादेशबाट साफ च्याम्पियनसिप सुरु हुँदा भारत विजेता बनेको थियो । त्यसयता उपाधि भारतबाहेक अन्य टोलीले जित्न सकेको छैन । नेपाल हरेक संस्करणमा भारतसँग पराजित हुँदै आएको छ । भारतसँग ३ पटक फाइनलमा पराजित भएको नेपाल एक पटक सेमिफाइनलमा निराश भएको थियो ।’ 

साफ च्याम्पियनसिपको समूह ‘ए’मा रहेको नेपालले पहिलो खेलमा भुटानसँग खेल्दैछ । विराटनगरको सहिद रंगशालामा भुटानपछि पाकिस्तानसँग खेल्ने नेपालले समूहको अन्तिम खेलमा बलियो मानिएको प्रतिद्वन्द्वी बंगलादेशसँग प्रतिस्पर्धा गर्नेछ । 

तस्बिरहरू : सरिता खड्का