काठमाडौं । वीर अस्पतालका वरिष्ठ न्युरो सर्जन प्राडा ध्रुव अधिकारीले चाकडी र घुस दिन नसक्ने भन्दै राजीनामा दिएका छन् । घुस दिन नसक्दा एक वर्षदेखि तलब नपाएको जनाउँदै उनले आफ्नो राजीनामा सोमबार उपप्रधान एवं स्वास्थ्य तथा जनसंख्या मन्त्री उपेन्द्र यादवलाई बुझाएका हुन् ।

“विगत एक वर्षदेखि तलबविहीन भएर वीर अस्पतालको न्युरो सर्जरीमा कामकाज गर्दै आएको छु,” उनले भने, “आफू नौ तहमा बढुवा भएको तर सो सरहको तलब एक वर्षसम्म पाइन । बढेको तलब र बढुवाको माग अस्पताल र मन्त्रालयमा गर्दा कुनै चासो देखाएनन । त्यसपछि राजीनामा दिएको हुँ ।”

पटक–पटक तलब नपाएको जानकारी गराउँदा पनि मन्त्रालयले बेवास्ता गरेको गुनासो उनको थियो । प्रा।डा। अधिकारीले थपे, “मन्त्रालयका एक कर्मचारीले नेशनल मेडिकल कलेजको त फाइल पास भयो, तपाईंको पनि बढुवा हुन्छ तर पैसा खर्च गनुपर्छ भनेर जवाफ दिए  । मलाई चाकडी र घुसको रकम दिएर काम गर्न मन लोगन, अनि राजीनामा दिएँ । वीर अस्पतालमा आएका चिकित्सक तथा कर्मचारी सबैको बढुवा भएको छ र तलब पनि पाएका छन् । तर मैलै एक वर्षदेखि बिनातलब काम गरिरहेको छु ।”

चार पटकसम्म उपप्रधान एवं स्वास्थ्य तथा जनसंख्यामन्त्री उपेन्द्र यादवलाई भन्दा पनि आफ्नो समस्या समाधान गर्न उनले खासै चासो नदिएको गुनासो उनको छ । वीर अस्पताललाई बारम्बार पत्र लेखेर अथक प्रयास गर्दा पनि वीर अस्पतालमा आफ्नो पोस्टिङ नगरी पूर्वाग्रह राखेर दु।ख दिएकोले राजीनामा दिनुपरेको उनले मन्त्रालयमा बुझाएको राजीनामा पत्रमा उल्लेख छ । “चाकडी र घुससमेत मागअनुसार दिन असक्षम हुँदा राजीनामा दिएको हुँ,” उनले राजीनामा पत्रमा कारण देखाएका छन् ।  

स्वास्थ्य तथा जनसंख्या मनत्रालयका प्रवक्ता महेन्द्र श्रेष्ठको भनाइ भने फरक छ । उनका अनुसार डा अधिकारीलाई एक वर्षअघि नौ तहमा बढुवा गरी पोखरा सरुवा गरिएको थियो । तर, उनी पोखरा गएनन् । त्यसपछि मन्त्रालयले उनलाई काजमा वीर अस्पतालमा राखेको थियो । 

“कानुनअनुसार पनि वीरमा नै राख्न नमिल्ने भएकाले केही दिन उता हाजिर गरेर आउनु भनेर  मन्त्रीज्यूले पनि भनुभएको थियो । तर उहाँ जान मान्नुभएन,”  प्रवक्ता श्रेष्ठ भन्छन्, “हामीले पनि ऐन विपरित काम गर्नुभएन ।”

डा अधिकारीले राजीनामा दिएसँगै अस्तपालको न्युरो शाखा नै बन्द हुने अवस्थामा पुगेको छ । अस्पतालको न्युरोमा ३ जनाको दरबन्दी भएपनि हाल दुई चिकित्सकमात्र छन् । डा। अधिकारीको राजीनामासँगै न्युरो वार्डमा मात्र एक जना चिकित्सक रहेका छन् । न्युरोमा हरेक दिन २० देखि ३० जना बिरामी आउँछन् । यसरी न्युरोमा एक चिकित्सकमात्र हुँदा अस्पतालको न्युरो वार्ड नै बन्द हुने अवस्थामा पुग्ने कर्मचारीहरु बताउँछन् । मन्त्रालयले उनको राजीनामा भने स्वीकृत गरेको छैन ।