काठमाडौं । दुईवर्षपछि जापानमा हुने ओलम्पिक छनोटको पहिलो चरणका लागि म्यानमार पुगेको नेपाली महिला फुटबल टोली दोस्रो चरण पुग्ने सम्भावनाको निकै नजिक पुगिसकेको छ । 

भारतसँग बराबरी खेल्दै पहिलो चरणको यात्रा सुरु गरेको नेपालले समूह ‘सी’ को दोस्रो खेलमा आइतबार बलियो मानिएको म्यानमारसँग पनि बराबरी नतिजा निकालेको थियो । प्रत्येक समूहका दुई शीर्ष टोली सोझै दोस्रो चरण प्रवेश गर्नेछन् भने चार समूहमा तेस्रो हुनेमध्ये उत्कृष्ट दुई टिम पनि अगाडि बढ्ने भएकाले अपराजित रहँदा नेपालको सम्भावना बलियो बनेको हो । समूहमा सबैले दुई खेल खेलिसक्दा म्यानमार र भारत समान चार अंकका साथ शीर्ष दुई स्थानमा छन् । दुई अंक जोडेको नेपाल तेस्रो स्थानमा छ भने भारत र म्यानमार दुवैसँग हारेको बंगलादेशले खाता खोल्न सकेको छैन । यसअर्थमा नेपालले मंगलबार समूहको अन्तिम खेलमा बंगलादेशलाई पराजित गर्न सके शीर्ष दुईमा रहेर छनोट हुने सम्भावना बलियो रहन्छ । 

प्रशिक्षकका रुपमा नेपाली महिला टोलीको नेतृत्व गरिरहेका राष्ट्रिय पुरुष टोलीका पूर्व कप्तान हरि खड्कालाई अंकतालिकामा आफ्नो टोलीको अवस्था र नेपालको छनोट सम्भावनावारे राम्रो जानकारी छ । प्रतियोगितामा सबै टोलीले दुई–दुई खेल खेलिसकेका कारण उनले विपक्षी बंगलादेशलाई पनि राम्ररी जाच्न भ्याइसकेका छन् । 

प्रशिक्षक खड्काको विचारमा बंगलादेशको रक्षापंक्ति कमजोर छ । नेपाल भने समूहकै सबभन्दा बलियो मानिएको म्यानमारलाई बराबरीमा रोकेका कारण उच्च मनोबलका साथ आगामी खेलको व्यग्र प्रतिक्षा गरिरहेको छ । फुटबलमा आफ्नो राम्रो पक्षमा जोड दिनुका साथै विपक्षीको कमजोरीमा प्रहार गर्नुपर्ने सत्य राम्ररी बुझेका खड्काले बंगलादेशविरुद्धको खेलका लागि त्यहीअनुसार रणनीति बनाएको बताएका छन् । 

‘अर्को चरण प्रवेशका लागि हामी जित्नैपर्ने दबाबमा छौं । खेलाडीले सत प्रतिशत मेहनतका साथ खेलिरहेका छन् । बंगलादेशबिरुद्ध आक्रामक खेल्नेछौं,’ सुरुका दुई खेलमा हासिल गरेको सफलताले खेलाडीहरु उच्च मनोबलमा रहेको बताउँदै खड्काले थपे, ‘बंगलादेशको रक्षापंक्तिमा कमजोरी देखेका छौं । हामी त्यसैबाट फाइदा उठाउने रणनितीमा छौं । खेलाडीको मेहनतका कारण हामीले आफूभन्दा बलियो टिमलाई बराबरीमा रोकेका छौं । हाम्रा खेलाडी जितको भोकमा छन् । त्यसैले अर्को चरण पुग्नेमा म विश्वस्त छु ।’

म्यानमार पुग्नुअघि नेपाली टोलीले चीनको अभ्यास भ्रमण गरेको थियो । चीन भ्रमणमा खेलेका तीन अभ्यास खेलले टिममा रहेका कमजोरी सुधार्ने मौका दिएको र त्यो म्यानमारमा फलदायी भएको खड्काले बताए । 

प्रशिक्षक खड्कासँग सहमति जनाउँदै टिममा पहिलो पटक कप्तानको जिम्मेवारी पाएकी निरु थापाले पनि जित निकाल्नेमा विश्वस्त रहेको बताइन । उनले खेलाडीबीच राम्रो तालमेल रहेकाले प्रदर्शन राम्रो भइरहेको र अन्तिम खेलमा जित निकाल्न आतुर रहेको बताइन् । ‘अर्को चरणका लागि गर या मरको अवस्थामा छौं । हरसम्भव फराकिलो जित निकाल्ने कोसिसमा मैदान उत्रिनेछौ,’ उनले भनिन । 

नेपाली समयअनुसार बंगलादेशविरुद्धको खेल मंगलबार दिउसो २ः१५ बजे थुवुना रंगशालामा सुरु हुनेछ । 

भियतनाम र उज्वेकिस्तानले फिफा वरियताका आधारमा दोस्रो चरणमा स्थान बनाइसकेका छन् । अप्रिलमा हुने दोस्रो चरणको प्रतिस्पर्धामा सबै ४ समूहका शीर्ष दुई गरी ८, तेस्रो हुनेमध्येका उत्कृष्ट दुई तथा भियतनाम र उज्वेकिस्तान गरी १२ टोलीबीच प्रतिस्पर्धा हुनेछ ।