काठमाडौं । ललितपुरको सातोबाटोस्थित अखिल नेपाल फुटबल संघ (एन्फा)को मुख्यालयमा आजभोलि चहलपहल बढेको छ । कारण हो— पाँच वर्षपछि हुन लागेको सहिद स्मारक ‘ए’ डिभिजन लिग, क्लबहरुको अभ्यास, उमेर समूहको टोली छनोट र राष्ट्रिय महिला टोलीको प्रशिक्षण । 

चहलपहलकै बीच फरक आवाज सुनिन्छ, महिला आवाज । अर्थात् सधैं पुरुष खेलाडीको आवाजले गुञ्जायमान हुने एन्फा मैदानमा अचेल महिला स्वर पनि सुनिन्छ चर्कोसँग । वर्षमा मुश्किलले एकपटक आयोजना हुने एक हप्ते लिगबाहेक खासै अन्तर्राष्ट्रिय प्रतियोगितामा सहभागी हुन नपाएका महिला खेलाडी अहिले साफ च्याम्पियनसिपको तयारीमा जुटेका छन् । चार महिनापछि हुने साफ च्याम्पियनसिपको खेल तालिका सार्वजनिक भइसकेको छ । तरपनि प्रतियोगिता कुन देशमा आयोजना हुने भन्ने अझै टुंगो लागेको छैन । साफ च्याम्पियनसिपको उपाधि जित्न नसकेको नेपाल अहिले विजेता बन्ने लक्ष्यका साथ तयारीमा जुटेको छ ।

“विभिन्न टोलीबाट आएका खेलाडी छन् । उनीहरुले पछिल्लो समय गरेको प्रदर्शनका आधारमा राम्रो र नराम्रो पक्ष केलाएर तयारी सुरु गरेका छौं । गत संस्करणमा उत्कृष्ट प्रदर्शनका बाबजुद पनि हार्नुपर्यो । अहिले तयारीका लागि प्रशस्तै समय छ,” नेपाली महिला टोलीका प्रशिक्षक हरि खड्का भन्छन्, “दक्षिण एसियाका सबै टोलीलाई पराजित गरे पनि नेपाली टोली सधै छिमेकी भारतसँग पराजित हुँदै आएको छ । छोटो समयमा बंगलादेशले राम्रो प्रगति गरेको छ । हामीले भारत र बंगलादेशलाई मध्यनजर गर्दै खेलाडी तयार पार्ने काम गरेका छौं ।”  

साफ च्याम्पियनसिप अघि नेपालले चीनसँग मैत्रीपूर्ण खेल र ओलम्पिक छनोट खेल्नेछ । टिम छनोट प्रक्रियामा तीन विभागीय क्लबका २६ खेलाडीलाई प्रशिक्षक खड्काले डेढ महिनादेखि प्रशिक्षण गराइरहेका छन् । “खेलाडीहरु जितका लागि भोकाएका छन् । अभ्यासमा आउँदा खेल्नुपर्छ भन्ने सकारात्मक भावना लिएर आउँछन् । साफकै प्रतिद्वन्द्वीसँग ओलम्पिक छनोटमा पनि प्रतिस्पर्धा गर्नेछौं । त्यहाँ विपक्षीको कमजोरी पत्ता लगाउन सकिन्छ । यसका कारण हामी विजयी हुनेमा ढुक्क छौं,” चाँडै खेलाडीको अन्तिम सूची निकाल्ने तयारीमा रहेका प्रशिक्षक खड्काले भने, “खेलस्तरमा पनि निकै सुधार आएको छ । खेलाडीहरुले कडा मेहनत पनि गरेका छन् । महिला टोलीमाथि विभेद गरिएको छ भन्ने इखले होला, उनीहरु आफूलाई हरसम्भव प्रमाणित गर्ने पक्षमा छन् ।”  

मैदान अभावका कारण सबै टोलीका खेलाडीहरुले एन्फा मुख्यालयकै मैदानमा अभ्यास गर्नुपर्ने बाध्यता छ । त्यसमा महिला टोलीको पालो बिहान आउँछ । बिहानीको झिसमिसेमा पसिना–पसिना भएकी महिला टोलीकी कप्तान रेणुका नगरकोटी तयारीको पर्याप्त समय भएकाले राम्रो नतिजा निकाल्नेमा आशावादी छिन् ।

“नराम्रो पक्ष सुधार गर्ने तयारी थालेका छौं । हामी राम्रो प्रदर्शन गर्ने अपेक्षामा छौं,” झन्डै डेढ महिनाको अभ्यासपछि खेलाडीको प्रदर्शनमा क्रमिक सुधार आइरहेको भन्दै कप्तान नगरकोटीले भनिन्, “साफ आउन अझै चार महिना बाँकी छ । पहिले जस्तो एक महिनामा खेलाडी छनोट र तयारी गर्नुपर्ने अवस्था अहिले छैन । तयारीका लागि राम्रो समय पाएका छाैं । हामी आफूलाई प्रमाणित गर्दै गइरहेका छौ ।” 

गोलकिपिङ प्रशिक्षक मृगे्रन्द्र मिश्र पनि यसपटक उपाधि जित्नेमा आशावादी छन् । टोलीको तयारीबारे मिश्र भन्छन्, “तयारी राम्रो भएको छ । अहिले हाम्रो रक्षापंतिm बलियो छ र स्ट्राइकिङ राम्रो बनाउन लागिपरेका छौं । गोलकिपिङमा पनि सुधार आएको छ । अनुभवी र युवा खेलाडीको सम्मिश्रणले टोली थप मजबुत बन्छ । चार महिनाको तयारी खेलाडीका लागि नयाँ युग बन्नेछ ।”

साफअघि दुई मैत्रीपूर्ण खेल
नेपाली टोलीले भारतको सिलगुढीमा सम्पन्न साफ च्याम्पियनसिप पछि कुनै अन्तर्राष्ट्रिय प्रतियोगितामा सहभागिता जनाएको छैन । यसबीचमा एपिएफ क्लबमा आबद्ध राष्ट्रिय टोलीका केही खेलाडीले हङकङसँग मैत्रीपूर्ण खेल खेले । तर, साफ खेल्न जानुअघि नेपालले चीनसँग दुई मैत्रीपूर्ण खेल खेल्दैछ । त्यसका लागि टोली कात्तिक ९ गते चीन प्रस्थान गर्नेछ। 

ओलम्पिक छनोट प्रतियोगिता 
साफ च्याम्पियनसिपअघि नेपालले चीनसँग मैत्रीपूर्ण खेलबाहेक म्यानमारमा हुने ओलम्पिक छनोट प्रतियोगिता पनि खेल्नेछ । छनोट प्रतियोगितामा नेपालले भारतलगायतका देशसँग प्रतिस्पर्धा गर्नेछ । चीनमा मैत्रीपूर्ण खेलपछि नेपाली टोली सिधै म्यानमार जानेछ ।

मुख्य आशा सावित्राको 
नेपाली टोलीको मुख्य आश फरवार्ड सावित्रा भण्डारी हुन् । विभागीय टोली एपिएफबाट खेल्दै आएकी सावित्राले घरेलु प्रतियोगितासहित गत साफमा उत्कृष्ट प्रदर्शन गरेकी थिइन् । ‘गोलमेसिन’को उपमा पाएकी भण्डारीलाई प्रशिक्षक खड्काले मुख्य हतियार बनाउने योजना बनाएका छन् । खड्का भन्छन्, “हामीसँग दक्षिण एसियाकै उत्कृष्ट स्ट्राइकर सावित्रा छन् । जसबाट हामीले धेरै फाइदा उठाउन सक्छौ । सावित्राको रनिङ र अट्याकिङ पक्ष निकै राम्रो छ । त्यसलाई सदुपयोग गर्ने योजना बनाइरहेका छौं ।”

यस्तो छ खेलतालिका
नेपाल साफ च्याम्पियनसिपको समूह ‘ए’मा छ । नेपालसँगै समूह ‘ए’ मा बंगलादेश, भुटान र पाकिस्तान छन् । समूह ‘बि’मा भारत, श्रीलंका र माल्दिभ्स छन् । नेपालले समूहको पहिलो खेल पाकिस्तासँग खेल्नेछ भने दोस्रो भुटान र अन्तिम खेल बंगलादेशसँग खेल्नेछ ।