काठमाडौं । शिक्षा विभागको नाम फेरेर शिक्षा तथा मानव स्रोत विकास केन्द्र बनाइएको छ । नवगठित केन्द्रको महानिर्देशकमा तत्कालीन शिक्षा विभागकै महानिर्देशक बाबुराम पौडेललाई जिम्मेवारी दिइएको छ । बाँकी ५ सहसचिव भने जिम्मेवारीविहीन भएका छन् । 

केन्द्रमा ३ महाशाखा र १७ शाखा बनाइएको छ । शैक्षिक योजना तथा विकास महाशाखा, शैक्षिक प्रविधि तथा अनौपचारिक शिक्षा महाशाखा र मानव संशाधन महाशाखा रहेका छन् । शिक्षा विभागसँग सम्बद्ध शाखाहरुलाई शैक्षिक योजना तथा विकास, अनौपचारिक र शैक्षिक जनशक्ति विकास केन्दूको दूर शिक्षा र खुला सिकाइतर्फका शाखाहरुलाई शैक्षिक प्रविधि तथा अनौपचारिक शिक्षा महाशाखा तथा शैक्षिक जनशक्ति विकास केन्द्रको मानव संशाधन महाशाखा र अन्य प्रशासनसँग सम्बन्धित शाखालाई मानव संशाधन विकास महाशाखाअन्तर्गत राखिएको केन्द्रले जनाएको छ । 

त्यस्तै गुणस्तर मापनका लागि शैक्षिक गुणस्तर परीक्षण केन्द्रको अलग्गै नयाँ संरचना स्वीकृत भएको छ । केन्द्रमा पनि अनुसन्धान तथा गुणस्तर सुधार शाखा राखिएको छ । केन्द्रमा पाठ्यक्रम शाखा पनि रािखएको छ । यद्यपि, पाठ्यक्रम विकास केन्द्रको संरचना पनि कायमै छ । 

पाँच सहसचिव कामविहीन
नयाँ गठन भएको शिक्षा तथा मानवस्रोत विकास केन्द्रमा महानिर्देशक तोकिए पनि ५ सहसचिवहरु दीपक शर्मा, टेकनारायण पाण्डे, खगेन्द्र नेपाल, चूडामणि पौडेल र मन्त्रालय तानिएका परीक्षा नियन्त्रक अम्बिकाप्रसाद रेग्मी कामविहीन भएका छन् । 

कार्यान्वयनमा आएको नयाँ शिक्षा सेवाका ३ सयभन्दा बढी उपसचिव स्तरका कर्मचारी भने विगत केही समयदेखि बिनाजिम्मेवारी हाजिर गरेर बस्ने गरेका छन् । केन्द्रका उपसचिव चैतन्यप्रसाद निरौलाले जिम्मेवारी बाँडफाँट नभएर हाल आफूहरु कामविहीन भएको अवस्थामा रहेको बताए । उनी यसअघि ताप्लेजुङको जिल्ला शिक्षा अधिकारी थिए ।  
सहसचिवहरुलाई जिम्मेवारी दिने विषयमा छलफल भइरहेको शिक्षा मन्त्रालयले भने जनाएको छ । केही दिनमै सबैलाई जिम्मेवारी दिइसकिने मन्त्रालयको भनाइ छ ।