काठमाडौं । एसियालीको खेलकुदको महाकुम्भ एसियन गेम्स अघिको एसियन गेम्स फन रन नेपालमा पहिलोपटक आयोजना हुने भएको छ । नेपाल ओलम्पिक कमिटि एनओसीको आयोजनमा मंगलबार एसियन गेम्स फन रन हुने भएको हो ।

यसै बर्ष आयोजना हुने १८ औं संस्करणको एसियन गेम्स आगामी अगस्टमा इन्डोनेसिया हुँदैछ । जाकार्ता र पालेमबाङमा आयोजना हुने एसियन गेम्समा ४० खेलको ४६२ स्पर्धामा प्रतिस्पर्धा हुनेछ । उक्त  एसियन गेम्सको प्रवर्दन र सामाजिक उत्तरदायित्वको लागि नेपालमा एसियन गेम्स फन रन आयोजना गर्न लागिएको हो ।

एसियन गेम्स फन रनमा करिब १४ सयले सहभागिता जनाउने एनओसीले सोमबार पत्रकार सम्मेलनको आयोजनाबाट जानकारी गराएको छ । ओलम्पिक खेलसँग सम्बन्धित सस्था तथा नेपालमा रहेका खेलकुद संघसँगै नागरिकले सहभागिता जनाउन पाउने फन रन बिहान ७ बजे सुरु हुने एनओसीले जनाएको छ ।

सातदोबाटोस्थित नेपाल ओलम्पिक कमिटिको भवनबाट सुरु हुने फन रन जावलाखेल, पुल्चोक, गाबहाल हुँदै पुन सातदोबाटो आएर समापन हुनेछ । एसियन गेम्स फन रन ७ किमीको हुनेछ । जसमा विभागीय टोलीहरु त्रिभुवन आर्मी क्लब, एपीएफ क्लब र पुलिस क्लबबाट समान एक एक सय खेलाडी सहभागी हुनेछन्  । यस्तै राष्ट्रिय खेलकुद परिसदमा दर्ता भएका खेल संघबाट २० देखि ७५ जना खेलाडी सहभागी हुने एनओसीले जनाएको छ ।

एसियन गेम्स फनको लागि एसियन गेम्स इन्डोनेसिया आयोजक कमिटिका  मिडिया तथा पब्लिक रिलेसन उप निर्देशक रत्न इर्सना, ओलम्पिक काउन्सिल अफ एसिया  ओसीएका मिडिया म्यानेजर जिन् झू जियान र ओसीएका अध्यक्ष अहमद अल फाहदका सचिव विस्सम टार्मनी नेपाल आएका छन् ।

पत्रकार सम्मेलनमा बोल्दै नेपाल ओलम्पिक कमिटिका अध्यक्ष तथा प्रतिनिधी सभाका सदस्य जीवन राम श्रेष्ठले एसियन गेम्सको प्रमोट गर्न र ओलम्पिक मुभमेन्टको लागि एसियन गेम्स फन रन आयोजना गर्न लागेको जानकारी दिए ।  यस्तै अध्यक्ष श्रेष्ठले सरकारसँग छलफल गरेर एसियन गेम्समा सहभागिता जनाउने खेल र खेलाडीको तय गर्ने जानकारी गराए । एसियन गेम्सको लागि राष्ट्रिय खेलकुद परिसद राखेपले  राखेप उपाध्यक्ष लामा टेण्डी शेर्पाको संयोजकत्वमा ९ उच्च स्तरीय समिति गठन गरिसकेको छ ।

तस्विर श्याम चित्रकार