काठमाडौं । युएस–बंगला एयरलाइन्सको ‘बम्बाडियर (डीएच–८–डी) जहाज दुर्घटनाका २२ जना घाइतेमध्ये चार जनाको आईसीयूमा उपचार भैरहेको छ । जसमध्ये दुई जना नेपाली  छन् । प्रिन्सी धामी र समिरा व्यञ्जनकार रहेका छन् । उनीहरुको काठमाडौं मेडिकल कलेज सिनामंगलमा उपचार भैरहेको छ । 

त्यस्तै इमरान कविर र रिजवानुल हाक्यु नाम गरेका दुई बंगाली नागरिकको पनि आईसीयूमा उपचार भैरहेको छ । उनीहरुको क्रमशः काठमाडौं मेडिकल कलेज र ओम हस्पिटलमा उपचार भैरहेको नेपाल नागरिक उड्डय प्राधिकरणले जनाएको छ । जम्मा ११ जना नेपालीको उपचार भैरहेको छ । ६७ जना यात्रु सवार रहेको विमानमा ३३ जना नेपाली थिए । 

उपचार भैरहेका अन्यमा ९ जना नेपाली रहेका छन् । ग्राण्डी हस्पिटलमा किशोर त्रिपथी, हरिप्रसाद सुवेदी, दयाराम ताम्राकार, विनोद पौडेलको उपचार भैरहेको छ । नर्भिक हस्पिटल थापाथलीमा बसन्त बोहरा, आशिस रञ्जित र सोनाम शाक्यको उपचार भैरहेको छ । प्राधिकरणका अनुसार न्युरो हस्पिटलमा दिनेश हुमागाइँ र मेडी सिटी हस्टिलमा केशव पाण्डेको उपचार भैरहेको छ । अन्य बंगलादेशी नागरिकको नर्भिक, ओम र काठमाडौं मेडिकल कलेज सिनानमंगलमा उपचार भैरहेको छ । 

“उपचार गराइरहनु भएका तीन/चार जना बाहेक सबै आउट अफ डेन्जर अवस्थामा रहेको जानकारी हामीलाई आएको छ,” संस्कृति तथा नागरिक उड्डयन मन्त्रालयका सचिव कृष्णप्रसाद देवकोटाले भने ।  

अहिले केएमसीमा हाल १० जना, अर्भिकमा ५ जना, ओममा १जना, ग्राण्डीमा ४ जना र मेडीसिटीमा १ जना गरी जम्मा २१ जना उपचाररत रहेका सचिव देवकोटाले जानकारी दिए । 
युएस–बंगला एयरलाइन्सको ‘बम्बाडियर (डीएच–८–डी) जहाज सोमबार अपरान्ह दुघर्टना हुँदा चालक दलका सदस्सहित ४९ जनाको मृत्यु भएको थियो । 

दिवंगत विदेशी नागरिकको शव भने पोष्टमार्टमपश्चात परराष्ट्र मन्त्रालय तथा दूतावासमार्फत आफन्तको जिम्मा लगाइने जानकारी दिइएको छ ।