धनगढी  । प्रधानमन्त्री कप महिला राष्ट्रिय क्रिकेट प्रतियोगिता बुधबारबाट धनगढीमा सुरु हुने भएको छ । आयोजक कैलाली जिल्ला खेलकुद विकास समितीले मंगलबार पत्रकार सम्मेलन गर्दै प्रतियोगिता बुधबारबाट सुरु हुने जनाएको हो  ।

फागुन १३ गतेसम्म सञ्चालन हुने प्रतियोगितामा पाँच विकास क्षेत्र र एक विभागीय टोली सशस्त्र प्रहरी बलको एपीएफ गरी ६ टोलीको सहभागिता रहेको छ  । सहभागी ६ टोलीहरुलाई दुई समुहमा विभाजन गरिएको छ । समुहका विजेता र उपविजेताले सेमिफाईनलमा स्थान बनाउने छन्  ।

राष्ट्रिय खेलकुद परिषद्को संयोजकत्व हुने प्रतियोगिताको उद्घाटन खेलमा सुदूरपश्चिम र पश्चिमाञ्चलबीच हुने प्रतियोगिता संयोजक बाबुराजा श्रेष्ठले जानकारी दिए । प्रतियोगिताको उद्घाटन राखेपका सदस्य सचिव केशव विष्टले गर्नेछन् ।

प्रतियोगिताको विजेताले पाँच लाख तथा उपविजेताले दुई लाख रुपैया पुरस्कार प्राप्त गर्ने छन् ।  त्यस्तै, वुमन अफ द सिरिजलाई १० हजार र अन्य चार विधाका उत्कृष्ट खेलाडीलाई जनही पाच हजार रुपैया पुरस्कार प्रदान गरिने छ ।

धनगढीको फाप्ला मैदानमा हुने प्रतियोगिताको लागि सगरमाथा सिमेन्ट मुख्य प्रायोजक रहेको छ । प्रतियोगितामा झण्डै साढे ३८ लाख खर्च हुने अनुमान गरिएको छ ।