भक्तपुर । नेकपा माआवादी केन्द्रका प्रवक्ता पम्फा भूसालले बाम गठबन्धन विदेशीको इशारामा नबनेको बताएकी छन् । रफत सञ्चार क्लबले आयोजना गरेको साक्षात्कार कार्यक्रममा बाम गठबन्धन नेपालका बामपन्थीका साथै नेपालको आवश्यकतालाई ध्यान दिँँदै निर्माण गरेको र विदेशीको इशारामा नबनेको उनले बताइन् ।
उनले निर्वाचनलाई लक्षित गरेर बनेको बाम गठबन्धनमा आवद्ध भएका राजनीतिक दलहरुले आ–आफ्नो चुनाव चिन्ह लिएर चुनावमा जान सक्ने प्रष्ट्याइन् । वर्तमान सरकारको जिम्मेवारी जसरी पनि निर्वाचन सम्पन्न गर्ने रहेकाले आफ्नो पार्टीले निर्वाचन अघि सरकार नछाड्ने उनले बताइन् ।
तोकिएकै समयमा निर्वाचन सफल हुने बताउँदै उनले बाम गठबन्धनमा निर्वाचन क्षेत्रका विषयलाई लिएर बाहिर आएको हल्ला जस्तो नभई छलफल जारी रहेको बताइन् ।