काठमाडौं । संसद् विघटनविरुद्ध दायर १८ वटा रिटमा आज सर्वोच्च अदालतको संवैधानिक इजलासमा सुनुवाइ हुँदै छ । 

आइतबार संसद विघटन गरिएपछि सो निर्णय असंवैधानिक भन्दै सर्वोच्च अदालतमा १८ वटा रिट दर्ता भएका थिए । जसमध्ये चारवटा रिट संवैधानिक फाँटमा दर्ता भएका थिए भने १४ वटा रिट प्रधानन्यायाधीश चोलेन्द्रशमशेर राणाको एकल इजलासले संवैधानिक इजलासमा पठाएको हो । ती सबै रिट आज संवैधानिक इजलासमा पेसीमा छन् ।

प्रधानन्यायाधीश चोलेन्द्रशमशेर राणासहितको इजलासमा न्यायाधीशहरु हरिकृष्ण कार्की, विश्वम्भरप्रसाद श्रेष्ठ, अनिलकुमार सिन्हा र तेजबहादुर केसी छन् ।

राष्ट्रपति विद्या भण्डारीले सरकारको सिफारिसमा आइतबार संसद् विघटन गरेकी थिइन् । “नेपालको संविधानको धारा ७६ को उपधारा (१) र (७) तथा धारा ८५ एवं संसदीय प्रणालीको आधारभूत मर्म एवं मूल्य-मान्यता तथा हाम्रो आफ्नै र संसदीय प्रणाली भएका विभिन्‍न मुलुकहरूको अभ्यासबमोजिम संघीय संसद्‌को वर्तमान प्रतिनिधिसभा विघटन” गरेकी थिइन् । 
२०७८ वैशाख १७ गते शुक्रबार पहिलो चरणमा र वैशाख २७ गते सोमबार दोस्रो चरणमा प्रतिनिधिसभाको निर्वाचन सम्पन्‍न गर्ने गरी निर्वाचनको मितिसमेत घोषणा भएको छ । संवैधानिक इजलासले संसद् विघटन गर्दा उल्लेख भएका संविधानको धारा ७६ को थप संवैधानिक व्याख्या गर्नेछ ।