राजनीति
काठमाडौं । रक्षामन्त्री बालकृष्ण खाँडले नेपालमा भारत र चीनविरोधी कुनै गतिविधि हुन नदिने स्पष्ट पारेका छन् ।
आईतबार रिपोर्टर्स क्लब नेपालले आयोजना गरेको साक्षात्कारमा मन्त्री खाँडले भारत र चीन दुवै नेपालका असल छिमेकी मित्रराष्ट्र भएकाले दुवै देशविरोधी गतिविधि नेपालमा हुनै नदिने बताएका हुन् । उनले अघि थपे,“दुवै देश हाम्रा उच्च महत्व बोेकेका छिमेकी मित्रराष्ट हुन, दुवै मुुलुक जनसंख्या र भुगोलको हिसावले विशाल मुलुक हुन् ।”
उनले भारत र चीनको विकासको लागि पनि छिमेकी मुलुकमा शान्ति र स्थिरता हुन आवश्यक भएकोले चीन र भारत दुवै देशको विकास होस भन्ने आफूहरुको चाहना रहेको बताए ।
मन्त्री खाँडले नेपाल दुवै विशाल छिमेकी मुलुकहरुको वीचमा रहेकोले यसको सूरक्षाको महत्व रहेको बताउँदै भने, “यसको धेरै ठूलो रणनैतिक महत्व छ, नेपालले संसारका कुनैपनि देशको खिलाफामा विरोधी गतिविधि हुन दिनुहुँदैन, र नेपालमा चीन र भारतको विरुद्धमा कुनै पनि खालका विरोधी गतिविधि गर्न दिनुहुँदैन ।”
उनले त्यसको लागि नेपालले भारतीय र चिनियाँ सरकार र जनतामा कुनै शंका उपशंका गर्न दिन नहुने जिकिर गरे । उनले भने, “त्यसैले हाम्रो निश्कर्ष भनेको नै नेपालमा भारत र चीनविरोधी गतिविधि गर्न दिनुहुँदैन्, त्यही अनुसार नै हामी बढो उच्च सर्तकताका साथ अघि बढिरहेका छौं ।”
नेपाली सेनालाई संघीय संरचनाअनुुसार नै ७ प्रदेशमै नेपाली सेनाको उपस्थिति होस् र सेनाको सञ्चालन केन्द्रिय संघीय सरकारले नै गर्ने र समन्वयकारी भूमिकाको लागि ७ वटै प्रदेशमा उपस्थिति होस् भन्ने सेनाको सोँचाईलाई आफूहरुले सकारात्मक रुपमा लिएको उनको भनाई थियो ।
उनले मुलुक यतिवेला संविधान कार्यान्वयनतर्फ अघि बढिरहेको बताए । संविधान संशोधनमार्फत सबैको अपनत्व हुनेगरि संविधान संशोधनको प्रयत्न भैरहेको समेत उनले स्प्ष्ट पारे ।
नेपाली काँग्रेसका नेता समेत रहेका खाँडले पार्टीको भातृ संगठन नेपाल तरुण दलको चौथो महाधिवेशन तोकिएकै मितिमा हुने विश्वास व्यक्त गरे । महाधिवेशन निर्देशक समितिका संयोजक समेत रहेका खाँडले पार्टीमा अहिले कुनै खेमा नभएकोले महाधिवेशन पार्टीका सभापति शेरबहादुर देउवा र वरिष्ठ नेता रामचन्द्र पौडेलको सहमतिअनुसार नै हुने जिकिर गरे ।
प्रकाशित मिति: आइतबार, कात्तिक २१, २०७३ १४:४१
प्रतिक्रिया दिनुहोस्