वासिंगटन डिसि । झण्डै ३० वर्षयताकै सबैभन्दा महत्त्वपूर्ण बन्दुक तथा हतियारसम्बन्धी कानुन अर्थात् बन्दुक नियन्त्रण विधेयक अमेरिकी सिनेटले पारित गरेको छ ।
विधेयकको पक्षमा ६५ मत खसेर अनुमोदन भएको हो । उक्त विधेयक आउनुमा गत महिना न्युयोर्कको बफेलोको एक सुपरमार्केट र टेक्सासको उभाल्डेको एक प्राथमिक विद्यालयमा भएको सामूहिक गोलीकाण्डलाई श्रेय जान्छ, जसमा ३१ जनाको मृत्यु भएको थियो ।
राष्ट्रपति जो बाइडेनले कानुनमा हस्ताक्षर गर्नु अगाडि विधेयक प्रतिनिधि सभामा पारित गर्नुपर्नेछ । जुन केहीदिन भित्रै हुने अपेक्षा गरिएको छ । यद्यपि, विधेयकमा परेका प्रस्तावहरू डेमोक्र्याट र कार्यकर्ताहरूले आह्वान गरेभन्दा धेरै कम परेको बीबीसीले टिप्पणी गरेको छ ।
विधेयकमा सुधारका लागि १५ बिलियन डलरको संघीय कोष खडा गर्ने उल्लेख छ । जसमा मानसिक स्वास्थ्य र विद्यालय सुरक्षा स्तरवृद्धिहरूका कार्यक्रम, बन्दुक खरिद गर्ने २१ वर्षभन्दा कम उमेरका खरिदकर्ताहरूको पृष्ठभूमी कडा रुपमा जाँच गर्ने उल्लेख छ ।
यसअघि रिपब्लिकन पार्टीले अमेरिकी बन्दुक सम्बन्धी कानुनलाई बलियो बनाउन खोज्दा रोकेको थियो ।
