काठमाडौं । अर्को वर्ष चीनमा हुने एएफसी एसियन कपमा छनोट हुने सम्भावना समाप्त भइसकेको नेपालले आज छनोट प्रतियोगितामा इन्डोनेसियाविरुद्ध प्रतिस्पर्धा गर्दै छ ।

तेस्रो चरणको छनोट प्रतियोगिताको समूह ‘ए’मा नेपाल यसअघि जोर्डन र कुवेतसँग पराजित भएको थियो । उक्त हारसँगै नेपालको अगाडिको यात्रा सकिएको छ । आजको खेल नेपालका लागि सान्त्वना बन्नेछ ।

छनोट प्रतियोगिताको ६ समूहबाट विजेता टोली र उपविजेतामध्ये उत्कृष्ट पाँच टोलीले चीनमा हुने प्रतियोगितामा स्थान पक्का गर्नेछन् । दुई खेलबाट अंकविहीन नेपाल समूह ‘ए’को पुछारमा छ । तीन अंक जोडेको इन्डोनेसिया दोस्रो स्थानमा छ । अगाडिको यात्रा तय गर्ने सम्भावना कायम राख्न पनि आज इन्डोनियालाई जित्नैपर्ने दबाब छ । नेपाल दबाबमुक्त छ ।

खेल कुवेतको जाबिर अल अहमद स्टेडियममा नेपाली समयानुसार राति १ बजे सुरु हुनेछ ।नेपालका लागि यो खेल प्रतिष्ठाको लडाइँ मात्र हुनेछ ।

इन्डोनेसिया यसअघि जोर्डनसँग १–० ले पराजित भएको थियो । कुवेतलाई २–१ ले हराएको थियो । नेपाल भने जोर्डनसँग २–० र कुवेतसँग ४–१ ले पराजित भएको थियो ।

कुवेतविरुद्धको खेलमा नेपालका मुख्य प्रशिक्षक अब्दुल्लाह अल्मुताइरी मैदानमा ढलेका थिए । उनलाई अक्सिजन दिएर अस्पताल लगिएको थियो । अहिले उनको अवस्था सामान्य छ । टिममा सामेल भएर प्रशिक्षण गराइसकेका छन् । उनलाई त्यो दिन के भएको थियो भनेर अखिल नेपाल फुटबल संघ (एन्फा)ले अहिलेसम्म आधिकारिक धारणा सार्वजनिक गरेको छैन ।