काठमाडौं । त्रिभुवन आर्मी क्लबले छैटौं संस्करणको आरबीबी–एनभीए राष्ट्रिय महिला तथा पुरुष क्लब भलिबल लिग प्रतियोगिताको पुरुषतर्फ लगातार पाँचौं जित निकालेको छ । 

त्रिपुरेश्वरस्थित राखेपको कभर्डहलमा शुक्रबार नेपाल पुलिस क्लबलाई ३–१ को सेटमा हराउँदै आर्मीले लगातार पाँचौँ जित निकालेको हो । पहिलो सेट गुमाएपनि आर्मीले उत्कृष्ट पुनरागमन गरेको थियो । 

आर्मीले पुलिसमाथि १७–२५,२५–२०,३०–२८ र २५–२३ को सेटमा जित निकालेको हो । जितसँगै आर्मीले ५ खेलमा १५ अंक जोडेको आर्मी शीर्ष स्थानमा उक्लिएको छ ।

पुलिसको ५ खेलमा ९ अंक रहेको छ ।

पुरुष तर्फको अघिल्लो खेलमा हेल्प नेपाल स्पोर्ट्स क्लबले पनि पाँचौ जित निकालेको छ । गलकोट स्पोर्ट्स क्लबलाई पराजित गर्दै हेल्प नेपालले आफ्नो अपराजित यात्रालाई निरन्तरता दिएको हो । हेल्पले गल्कोटमाथि २५–१५,२५–१३ र २५–२१ को सेटमा जित निकालेको हो । हेल्प नेपालकाे १४ अंक छ ।

शुक्रबार नै एपीएफ क्लबले ढोरपाटन स्पोर्ट्स क्लबलाई ३–० को सोझो सेटमा हरायो । एपीएफले ढोरपाटनमाथि २५–१५, २५–१३ र २५–१४ को सेटमा पराजित गरेको हो । 

त्यस्तै महिलातर्फ एपीएफसँग न्यु डायमण्ड ३–० को सेटमा पराजित भयो । एपीएफले न्यु डायमण्डलाई २५–१९, २५–१० र २५–९ को सेटमा हराएको हो । न्यु डायमण्डको यो लगातार चौँथो हार हो ।

प्रतियोगितामा पुरुषतर्फ ७ टिम र महिलातर्फ ५ टिमको सहभागिता रहेको छ । पुरुषतर्फ त्रिभुवन आर्मी क्लब, नेपाल पुलिस क्लब, एपीएफ क्लब, हेल्प नेपाल, गण्डकी प्रदेश, गल्कोट स्पोर्ट्स क्लब र ढोरपाटन क्लब रहेको छ । महिलातर्फ त्रिभुवन आर्मी क्लब, नेपाल पुलिस क्लब, एपीएफ क्लब, न्यु डायमण्ड र एभरेस्ट भलिबल क्लब रहेको छ । 

विजेताले ६ लाख, उपविजेताले ३ लाख, तेस्रोले १ लाख ५० हजार र चौँथोले ७५ हजार प्राप्त गर्ने छन् ।

हेर्नाेस्, एपीफ र ढाेरपाटन स्पाेर्ट्स क्लबबीचकाे खेलका केही तस्बिरहरू 

तस्बिर : हरिशजंग क्षेत्री