काठमाडौं । नेपाली कांग्रेसका प्रदेश सभापतिहरूले स्थानीय तह निर्वाचनसम्बन्धी तालमेल गर्ने अधिकार स्थानीय तहलाई दिनुपर्ने माग राख्ने भएका छन् ।

शुक्रबारको केन्द्रीय समिति बैठकअघि काठमाडौंमा बसेको प्रदेश सभापतिहरूको बैठकले उक्त निर्णय गरेको कांग्रेस प्रदेश नम्बर–१ का सभापति उद्धव थापाले जानकारी दिए ।

“स्थानीय तह निर्वाचनसम्बन्धी गठबन्धन गर्ने अधिकार स्थानीय तहलाई दिनुपर्ने माग राख्छौँ,” उनले भने ।

आज पार्टीको केन्द्रीय कार्यसमितिको बैठक बस्दै छ ।

प्रदेश सभापतिहरूको ‘प्रोटोकल’ टुंगो लगाउने विषय पनि बैठकमा उठाउने उनले बताए ।

प्रदेश सभापतिहरूले केन्द्रीय बैठकमा आमन्त्रित सदस्यका रूपमा उपस्थित नहुने भन्दै यसअघि नै लिखित धारणा प्रस्तुत गरिसकेका छन् । आजको बैठकमा पनि आफूहरूका माग सम्बोधन गराउन ध्यानाकर्षण गराउने तयारी गरेका छन् ।

यसअघि, प्रदेश सभापतिले प्रदेशभित्र प्रतिनिधिसभा, प्रदेशसभा, जिल्ला समन्वय समिति तथा स्थानीय तहहरूको नेतृत्व गर्ने भए पनि उनीहरूलाई केन्द्रबाटै टिकट वितरण हुँदा आफूहरू भूमिकाविहीन हुने भन्दै संसदीय बोर्ड, कार्यसम्पादन समिति र केन्द्रीय समितिमा पदेन सदस्यको भूमिका माग गरेका थिए ।

तर, सभापति शेरबहादुर देउवाले विधान संशोधनमार्फत उनीहरूले मागेको भूमिकालाई बेवास्ता गरी केन्द्रीय सदस्यमा आमन्त्रित सदस्यका रूपमा बोलाएका थिए । त्यसलाई अस्वीकार गर्दै प्रदेश सभापतिहरूले केन्द्रीय समितिको बैठक बहिष्कार गरेका थिए ।