काठमाडौं । राजेश पौडेलको ह्याट्रिकको सहयोगमा शनिबार बाँसबारी क्लबले सहिद स्मारक 'बी' डिभिजन लिग फुटबलमा मध्यपुर युथ एसोसिएसनलाई ६–० ले हराएको छ । अरू खेलमा वीरगन्ज युनाइटेड र रानीपोखरी कर्नर टिम (आरसीटी) तथा चर्च ब्वाइज क्लब र श्री कुमारी क्लबले बराबरी खेलेका छन् ।

शनिबार सातदोबाटोस्थित एन्फा मुख्यालयको मैदानमा भएको पहिलो खेलमा बाँसबारीले मध्यपुरमाथि आधा दर्जन गोल गरेको हो । २३औँ मिनेटमा सञ्जय धिमालले गोल गर्दै बाँसबारीलाई सुरुआती अग्रता दिलाएका थिए । ६२औँ मिनेटमा उनले व्यक्तिगत दोस्रो गोल गरे ।

राजेश पौडेलले भने ५१औँ, ६४औँ र ७८औँ मिनेटमा गोल गर्दै ह्याट्रिक पूरा गरेका थिए । त्यसअघि, ७१औँ मिनेटमा सुलेमान थापामगरले गोल गरेका थिए ।

जितसँगै लिग तालिकामा बाँसबारीले चार खेलबाट चार अंक जोडेको छ । मध्यपुरको समान खेलबाट तीन अंक छ । बाँसबारीले जारी लिगमा पहिलो जित निकाल्दा मध्यपुरले दोस्रो हार व्यहोरेको छ ।

वीरगन्ज २–२ आरसीटी
'बी' डिभिजन लिगअन्तर्गत शनिबारकै अर्को खेलमा वीरगन्ज युनाइटेड र रानीपोखरी कर्नर टिम (आरसीटी)ले २–२ को बराबरी खेले । बराबरीसँगै आरसीटी र वीरगन्जले समान चार खेलबाट समान पाँच अंक जोडेका छन् ।

चर्चा ब्वाइज बराबरीमा रोकियो
शनिबारै शीर्ष स्थानको चर्च ब्वाइज क्लबले श्री कुमारी क्लबसँग १–१ को बराबरी खेलेको छ ।

चर्च ब्वाइजले ४७औँ मिनेटमा लिएको अग्रता जोगाउन नसक्दा कुमारीसँग अंक बाँडेको हो । चर्च ब्वाइजका लागि आशिष चापागाईंले गोल गर्दै टोलीलाई अग्रता दिलाएका थिए । कुमारीका लागि निरबहादुर आलेले ५५औँ मिनेटमा बराबरी गोल फर्काए ।