विराटनगर । मोरङको रंगेली नगरपालिकाका मेयर दिलिप बगडियालाई पदबाट हटाउन माग गर्दै नेपाल कम्युनिष्ट पार्टी (माओवादी केन्द्र)ले निर्वाचन आयोग समक्ष सिफारिस गरेको छ ।
 
बगडिया माओवादी छाडेर आज नेकपा(एमाले) प्रवेश गर्दैछन् । चुनाव ताका उनी पुष्प कमल दाहाल (प्रचण्ड)को हातबाट अबिर लगाएर माओवादीमा प्रवेश गरेका थिए । रंगेलीमा एमाले अध्यक्ष केपी ओलीको उपस्थितिमा हुने सभामा बगडिया आज एमाले प्रवेश गर्दैछन् । यसअघि उनले स्थानीय चुनावकै मुखमा कांग्रेस छाडेर माओवादी रोजेका थिए ।
 
एमालेमा जाने निश्चित भएपछि माओवादी केन्द्र प्रदेश १ का अध्यक्ष हर्कबहादुर नेम्वाङ मिक्सोले विज्ञप्ति जारी गर्दै बगडियाले पार्टी हित विपरीत गतिविधि गरेकाले कारबाहीका लागि आयोगलाई सिफारिस गरेको जनाइएको छ । 

“पार्टीको चुनाव चिह्नबाट नगरप्रमुखमा निर्वाचित भएकाले नगर प्रमुख पदबाट निष्कासन गर्न पार्टीको केन्द्रीय कार्यालयमार्फत निर्वाचन आयोगलाई सिफारिस गरिएको व्यहोरा अवगत गराउँदछौं,” विज्ञप्तिमा उल्लेख  छ । विज्ञप्तिमा पार्टीले २०७८ साल फागुन १५ गतेदेखि लागु हुनेगरी पार्टीको साधारण सदस्यबाट उनलाई निस्काशन गरेको पनि जनाइएको छ । 

बगडिया उद्यमी हुन् । उनले इँटालगायत उद्योग संचालन गरेका छन् । आफ्नो व्यवसायमा मात्र ध्यान दिएको र पार्टीको कामलाई वास्ता नगरेको माओवादी केन्द्रले जनाएको छ ।