काठमाडौं । साविक विजेता अल्जेरिया अफ्रिकन अफ नेसन्सको समूह चरणबाटै बाहिरिएको छ । बिहीबार राति समूह चरणको अन्तिम खेलमा आइभोरी कोष्टसँग ३–१ ले पराजित भएपछि अल्जेरियाको यात्रा टुंगिएको हो ।

आइभोरी कोष्टले एक पक्षीय नतिजा निकालेपछि क्यामरुनमा उपाधि दाबेदार मानिएको अल्जेरिया जितबिहीन हुदै प्रतियोगिताबाट बाहिरिएको छ । समूह ‘ई’बाट आइभोरी कोष्ट सात अंकका साथ शीर्ष स्थानमा रह्यो । आइभोरी कोष्टले शीर्ष स्थानमा रहेर नकआउट चरणमा स्थान बनाउँदा इक्वेटोरियल गिनी उपविजेता बन्दै नकआउट चरणमा स्थान बनाउन सफल भयो । एक अंक जोडेको अल्जेरिया समूहको पुछारमा रह्यो । 

यसअघि पूर्व विजेता घाना पनि प्रतियोगिताको समूह चरणबाटै बाहिरिको थियो । अल्जेरिया र घाना समूह चरणबाटै बाहिरिदाँ कोमोरोस र गाम्बिया भने पहिलो पटक नकआउट चरणमा स्थान बनाउन सफल भए । 

समूह ‘ई’ कै अर्को खेलमा इक्वेटोरियल गिनीले सिएरा लियोनलाई १–० ले हराएको थियो । गएराति नै समूह ‘एफ’मा गाम्बियाले ट्युनेसियालाई १–० ले हरायो भने मालीले मौरिटानियाविरुद्ध २–० को विजय हासिल गर्यो । 

समूह ‘एफ’बाट समान सात अंक जोडेका माली र गाम्बियाले अघिल्लो चरणमा स्थान पक्का गरे । पूर्व विजेता ट्युनेसिया पनि तेस्रो स्थानमा रहेर नकआउट चरणमा स्थान बनाउन सफल भयो । 

यससँगै प्रतियोगितामा नकआउट चरणको समीकरण पूरा भएको छ । नकआउट चरणमा बुर्किना फासो र गाबोनले प्रतिस्पर्धा छन् । नाइजेरियाले ट्युनेसियाविरुद्ध खेल्नेछ । सेनेगलले कोप भोर्डसँग प्रतिस्पर्धा गर्नेछ भने मालीले इक्वेटोरियल गिनीविरुद्ध खेल्नेछ । 

त्यस्तै गिनीले गाम्बियाविरुद्ध तथा आयोजक क्यामरुनले कोमोरोसविरुद्ध खेल्नेछ । आइभोरी कोष्टले इजिप्टविरुद्ध खेल्नेछ । मोरोक्कोले मलावीसँग प्रतिस्पर्धा गर्नेछ ।