काठमाडौं । साविक विजेता युभेन्टसले मंगलबार राति साम्पडोरियालाई ४–१ ले हराउँदै इटालियन कपको क्वार्टरफाइनलमा स्थान बनाएको छ । यससँगै युभेन्टसले जारी सिजन कम्तिमा एक उपाधि जित्ने सम्भावना कायम राखेको छ । 

युभेन्टसले हुवा कोर्डाडोको गोलबाट २५औं मिनेटमा अग्रता लिएको थियो । ड्यानिले रुगानीले ५२औं मिनेटमा अग्रता दोब्बर बनाए । एन्डेरा कोन्टीको गोलबाट साम्पडोरियाले पुनरागमनको प्रयास गरेको थियो । 

तर, ६७औं मिनेटमा युभेन्टसका पाउलो डिबालाले अर्को गोल थपेपछि साम्पडोरियाको प्रयास सफल हुन सकेन । ७७औं मिनेटमा अल्भारो मोराटाले चौथो गोल थपेपछि युभेन्टस सहज नतिजा निकाल्दै अन्तिम आठमा स्थान बनाउन सफल भयो । 

युभेन्टसले अब सेमिफाइनलमा स्थान बनाउनका लागि सासउलो र काग्लिएरीबीचको विजेतासँग प्रतिस्पर्धा गर्नेछ । 

मंगलबार राति नै अर्को खेलमा लाजियोले युडिनेलाई १–० ले हराउँदै अन्तिम आठमा स्थान पक्का गरेको छ । निर्धारित ९० मिनेटको समय गोलरहित बराबरीमा टुंगिएको थियो । त्यसपछि थपिएको ३० मिनेट समयको १६औं मिनेटमा सिरो इमोबिलले गरेको गोल लाजियोको जितमा निर्णायक बन्यो । 

लाजियोले अब सेमिफाइनल प्रवेशका लागि एसी मिलानविरुद्ध खेल्नेछ ।