काठमाडौं । मोइस केनको गोलमा युभेन्टसले बुधबार राति माल्मो एफएफलाई १–० ले हराउँदै समूह ‘एच’ को विजेता बनेर च्याम्पियन्स लिगको नकआउट चरणमा स्थान पक्का गरेको छ । 

इटालियन सिरी ‘ए’ को क्लब युभेन्टसको जितमा केनले १८औं मिनेटमा गरेको गोल निर्णायक बन्यो । च्याम्पियन्स लिगमा केनको यो पहिलो गोल हो । 

जितसँगै युभेन्टस १५ अंकका साथ समूहको शीर्ष स्थानमा रहन सफल रह्यो । जुन दोस्रो स्थानको चेल्सीभन्दा दुई अंकले माथि हो । दोस्रो स्थानको चेल्सीले गएराति जेनिट सेन्ट पिटर्सबर्गसँग ३–३ को बराबरी खेल्यो । जेनिट तेस्रो स्थानमा रह्यो भने माल्मो पुछारमा रह्यो । 

युभेन्टसले समूह चरणमा एकमात्र खेल चेल्सीसँग ४–० ले हारेको थियो । घरेलु लिगमा निरन्तर खराब प्रदर्शन गरेको युभेन्टसलाई च्याम्पियन्स लिगको सफलताले राहत मिलेको छ । चेल्सीले समूह समूहको उपविजेता बन्दै नकआउट चरणमा स्थान बनाउन सफल भयो । 

युभेन्टसलाई खेलाडीको चोटले सताएको थियो । प्रशिक्षक मासिमिलियानो एलेग्रीले १९ वर्षे रक्षक कोनी डी विन्टरलाई पहिलाे रोजाइमा खेलाउनु परेको थियो । उनले चेल्सीविरुद्धको अघिल्लो खेलमात्र बैकल्पिक खेलाडीका रुपमा डेब्यू गरेका थिए । गोलकिपर माटिया पेरिनले पनि च्याम्पियन्स लिगमा डेब्यू गरे ।