काठमाडौं । रसुवामा प्रथम संस्करणको हाइ अल्टिच्युड रसुवा माउण्टेन बाइक च्यालेन्ज प्रतियोगिता हुने भएको छ । प्रदेश खेलकुद विकास परिषद, वाग्मती प्रदेश र जिल्ला साइक्लिङ संघ रसुवाको संयुक्त आयोजनामा मंसिर १८ गतेबाट प्रतियोगिता हुने भएको हो ।
 
साहसिक खेलमा युवा पुस्तालाई आकर्षित गर्ने उद्देश्यले प्रदेश खेलकुद परिषदले वर्षको दोस्रो कार्यक्रममा साइक्लिङ गर्ने भएको हो । प्रतियोगितामा १५० जना खेलाडीले प्रतिस्पर्धा गर्ने आयोजकले बताएको छ ।
 
प्रतियोगिता रसुवाको कालिका गाउँपालिकाको सहिद गेट कालिकास्थानबाट सुरु भई ३५ किलोमिटर पार गरेर कालिका हिमालय क्याम्पसमा आएर पूरा हुनेछ । प्रतियोगितामा पुरुषतर्फ इलिट, जुनियर र मास्टर विधामा तथा महिलातर्फ इलिट विधामा प्रतिस्पर्धा हुने जिल्ला साइक्लिङ संघ रसुवाका अध्यक्ष दावा तामाङले बताए ।
 
त्यस्तै प्रतियोगितामा इलिटतर्फ प्रथमदेखि उत्कृष्ट १० जनाले ४० हजारदेखि क्रमशः एक हजारसम्म पुरस्कार पाउने छन् । त्यस्तै मास्टर र जुनियरतर्फ प्रथमदेखि तृतियसम्म हुनेले क्रमशः १५ हजार, १० हजार र ७ हजार पुरस्कार पाउनेछन् । 
प्रतियोगितामा सहभागिता जनाउनलाई नेपाल साइक्लिङ संघको फेसबुक पेजमार्फत मंसिर १० गतेसम्म अनलाई फारम भर्नुु पर्नेछ । प्रदेश खेलकुद विकास परिषद्, वाग्मती प्रदेशका सचिव सूर्यलाल भण्डारीले साहसिक खेलहरु गर्ने कार्यक्रम अन्तर्गत यो प्रतियोगिताले पनि खेलाडीमा साहसिक खेलको अनुभव हुने बताए । 

“साहसिक खेलकुदमा खेलाडीहरुको रुचि बढाउन यो प्रतियोगिताको आयोजना गरिएको हो । यसले खेलाडीहरुमा साहसिक खेल खेल्ने अनुभव पनि हुनेछ,” भण्डारीले भने ।