काठमाडौं । प्रधानमन्त्री शेरबहादुर देउवाले विश्वका नेताहरूलाई हिमालको विशिष्ट जलवायु जोखिम पहिचान गर्न र जलवायु सम्बन्धी सबै वार्ताहरूमा हिमालयको एजेन्डालाई उच्च प्राथमिकता दिन आग्रह गरेका छन् । यूकेको ग्लास्गोमा जारी संयुक्त राष्ट्रसंघीय जलवायु सम्मेलन कोप २६ मा विश्व नेताहरूको शिखर सम्मेलनलाई सम्बोधन गर्दै प्रधानमन्त्री देउवाले यस्तो आग्रह गरेका हुन् । 

उनले जलवायुजन्य प्रकोपको कारण बढ्दो हानि नोक्सानी प्रमुख चिन्ताको विषय भएकोमा जोड दिँदै यसलाई वार्ताको एकमात्र एजेन्डा बनाउन र यसका लागि थप वित्तीय सहयोगको रूपरेखामा सहमत हुन आह्वान गरे । प्रधानमन्त्री देउवाले कोप २६ ले वित्तीय, प्राविधिक र क्षमता अभिवृद्धिका स्रोतहरू बढाएर उच्च जोखिमयुक्त देशहरूलाई अनुकूलनका लागि पर्याप्त सहयोग सुनिश्चित गर्नैपर्ने बताए । 

प्रधानमन्त्री देउवाले पेरिस सम्झौता कार्यान्वयन गर्न दृढ रूपमा प्रतिवद्ध रहेको र यसको प्रमाण नेपालले अर्थतन्त्रको सबै क्षेत्रमा कार्बनमुक्त गर्ने महत्वकांक्षी एनडीसी (नेशनल्ली डिटरमाइन्ड कन्ट्रिब्युसन) योजना पेश गरेको बताए । उनले नेपालले सन् २०४५ सम्म नेट जिरो उत्सर्जनको लक्ष्य भेट्ने बताए । 

उनले सन् २०२५ अघि जलवायु वित्तसम्बन्धी नयाँ सामुहिक, परिमाणबद्ध र महत्वकांक्षी लक्ष्यका लागि स्पष्ट रोडम्याप (खाका)मा सहमत हुन पनि पक्षहरूलाई आग्रह गरे । प्रधानमन्त्री देउवाले प्रचुर मात्रामा जल, जंगल र जैविक विविधताका स्रोतहरू भएकाले स्वच्छ, हरित र प्रकृति आधारित जलवायु समाधानको बाँडफाँडमा नेपाल यस क्षेत्रकै नेता बन्न सक्ने बताए ।