काठमाडौं । साविक विजेता वेष्ट इन्डिज र बंगलादेश यूएई ओमानमा जारी आईसीसी ट्वान्टी–२० विश्वकपको सुपर–१२ मा पहिलो जितको खोजीमा छ । पहिलो दुई खेलमा पराजित भएपछि उपाधि रक्षाको अभियानमा होमिएको वेष्ट इन्डिजलाई ठूलो धक्का लागेको छ । समूह एकमा वेष्ट इन्डिज पुछारमा छ । बंगलादेश वेष्ट इन्डिजभन्दा एक स्थान माथि छ । बंगलादेशले सुपर–१२ मा पहिलो दुई खेल हारिसकेको छ । तथापी रनरेटका आधारमा बंगलादेशले वेष्ट इन्डिजलाई पछि पारेको हो ।

अबको हारले प्रतियोगितामा दुबै टोलीको यात्रा समाप्त हुनसक्छ । किनकी दुई समूहबाट शीर्ष दुईले सेमिफाइनलमा स्थान बनाउनेछन् । एक समूहमा ६ टोली छन् । त्यसैले वेष्ट इन्डिज र बंगलादेशका लागि आज ‘गर या मर’को खेल हुनेछ ।

वेष्ट इन्डिज इङ्ल्यान्डविरुद्धको खेलमा ५५ रनमा अलआउट भएको थियो । उक्त खेलमा वेष्ट इन्डिज ६ विकेटले हारेको थियो । दोस्रो खेलमा वेष्ट इन्डिज दक्षिण अफ्रिकासँग आठ विकेटले पराजित भएको थियो ।
 
वेष्टका ब्याट्सम्यान स्पिनरविरुद्ध खेल्न संघर्ष गरिरहेका छन् । त्यसकारण बंगलादेशविरुद्ध पनि वेष्ट इन्डिजलाई स्पिनर अवरोध बन्न सक्छ । बंगलादेशसँग उत्कृष्ट स्पिन बलर छन् ।
 
तर, बंगलादेश आफैं पनि यूएईमा लय भेट्टाउन संघर्ष गरिरहेको छ । पहिलो खेलमा श्रीलंकासँग पाँच विकेटले हारेको बंगलादेश दोस्रो खेलमा इङ्ल्यान्डसँग आठ विकेटले पराजित भएको थियो ।

ट्वान्टी–२० क्रिकेटमा बंगलादेश र वेष्ट इन्डिज १२ पटक आमनेसामने भएका छन् । बंगलादेशले पाँच पटक जितेको छ भने वेष्ट इन्डिजले ६ पटक जितेको छ । 

ओबेड म्याककेए घाइते भएपछि वेष्ट इन्डिजले उनको स्थानमा जसोन होल्डरलाई टिममा समावेस गरेको छ । भर्खरै सम्पन्न आईपीएलमा होल्डर राम्रो प्रदर्शन गरेका थिए । लेन्डल सिमोन्सले दक्षिण अफ्रिकाविरुद्ध राम्रो खेल्न सकेनन् । त्यसकारण वेष्ट इन्डिजले उनको स्थानमा क्रिस गेललाई ओपनरको रुपमा ल्याउन सक्छ ।

वेष्ट इन्डिजको सम्भावित टिम
इभिन लेविस, क्रिस गेल, रोष्टन चेज, निकोलस पुरन (विकेटकिपर), किरोन पोलार्ड (कप्तान), आन्द्रे रसेल, सिमरोन हेडमायर, ड्वानी ब्राभो, हेडेन वाल्श, एकील होसेन, रबी रामपाल ।

बंगलादेशको सम्भावित टिम
मोहम्मद नाइम, लिटोन दास, शाकिब अल हसन, मुश्फिकर रहिम, महमुदुल्लाह (कप्तान), अफिफ होसैन, नुरुल हसन (विकेटकिपर), महेदी हसन, नासुम अहमद, तास्किन अहमद, मुस्तफिजुर रहमान ।