काठमाडौं । मानिस पहिले साधारण आर्थिक अवस्था, साधारण पारिवारिक पृष्ठभूमि र सानो सपना लिएर राजनीतिमा प्रवेश गर्छन् । त्यही व्यक्ति जब राजनीतिमा सफल हुन थाल्छ, अनि उसलाई पुरानो अवस्थामा फर्कनुपर्ला भन्ने डर बढ्न थाल्दछ ।

उसलाई नाम, दाम र इज्जतको बानी बस्छ । जो यस मोहबाट हट्न सक्दैनन् उसले पदमा टिक्न र पैसा कमाउनका लागि कुनै पनि सम्झौता गर्न पछि हट्दैन । आफ्नो सफलताको लागि देशै बेच्नु परेता पनि तिनलाई परवाह हुँदैन । 

आज हामी एक यस्तो व्यक्तिको विषयमा प्रतिवाद गर्न गइरहेका छौं जसबाट यस प्रकारको व्यवहार हुँदैन भन्ने विश्वास थियो । एक साधारण पृष्ठभूमिबाट कम्युनिष्ट आन्दोलनमा होमिएका विष्णु पौडेल । 

उनीबाट देशको अस्तित्व नै संकटमा पर्ने यस प्रकारको निर्णय होला जस्तो लागेको थिएन । सायद उनका नेता तथा प्रधानमन्त्री केपी शर्मा ओलीलाई बलियो बनाउन होला वा भारतीय क्रसर उद्योग माफियाको प्रभाव धेरै भएर होला, उनले नेपालको ढुंगा, गिट्टी र बालुवा भारतमा निर्यात गर्न सकिने प्रावधान बजेटमा व्यवस्था गरे । 

आज हामी अर्थमन्त्री विष्णु पौडेलको सोही निर्णयका विषयमा प्रतिवाद गर्दैछौं ।

नेकपा एमालेका नेता तथा प्रधानमन्त्री केपी शर्मा ओलीका विश्वास पात्र  पौडेलले अर्थ मन्त्रालय सम्हालेपछि उनीभन्दा अघिल्ला अर्थमन्त्रीभन्दा धेरै राम्रो काम गरेका थिए । देशको अर्थतन्त्र बलियो बनाउन उनको भूमिका सकारात्मक हुन्छ भन्ने विश्वासले गर्दा नेपालको स्टक मार्केट पनि लगातार उकालो लाग्दै आएको छ । 

गत हप्ता उनले प्रस्तुत गरेको बजेटमा पनि उनले सांसद कोष खारेज गरे, जुन निर्णयले नेपालमा सांसदको भूमिकालाई सही बाटोमा ल्याउन निकै मद्दत गर्नेछ । बिजुली कारको सन्दर्भमा सकारात्मक निर्णय गरे । विश्वका उत्कृष्ट दश विद्युतीय सवारी साधन उत्पादन गर्ने कम्पनीलाई नेपालमा कारखाना खोल्न आकर्षित गर्ने घोषणा गरे । उनले उद्योगमा ऋण ब्याजदरमा छुट र साना उद्यमीलाई करका दरमा छुट पनि प्रदान गरे । 

यति सबै गर्दा गर्दै किन नेपालको वातावरणमा अत्यन्त प्रतिकूल प्रभाव पर्ने निर्णय लिए ?  

प्रस्तुत छ, यही विषयमा केन्द्रित रहेर तयार पारिएको कार्यक्रम प्रतिवाद