काठमाडौं । बोरुसिया डर्टमण्डले जर्मन कप फुटबलको उपाधि जितेको छ । जर्मन माहारथीले सहज जित निकाल्दै जर्मन कपको उपाधि जितेको हो । बिहीबार राति भएको फाइनलमा आरबी लाइपजिगलाई ४–१ गोल अन्तरले पराजित गर्दै डर्टमण्ड च्याम्पियन बनेको हो ।
डर्टमण्डलाई उपाधि दिलाउन जाडोन सान्चो र अर्लिङ हालाण्डले दुई/दुई गोल गरे । लाइपजिगका डानिल ओल्मोले एक गोल फर्काए । डर्टमण्डले पाँचौ पटक जर्मन कपको उपाधि जित्न सफल भएको छ । पहिलो पटक डर्टमण्डले १९६५ मा जर्मन कप जितेको थियो ।
खेलको पाँचौं मिनेटमा सान्चोले गोल गर्दै डर्टमण्डलाई अग्रता दिलाएका थिए । हालान्डले २८ औं मिनेटमा गोल गर्दै डर्टमण्डको अग्रता दोब्बर पारे । सान्चोले पहिलो हाफको इन्जुरी समयमा व्यक्तिगत दोस्रो गोल गर्दै टिमलाई ३–० गोलको अग्रता दिलाए ।
७१ औं मिनेटमा डानिलले गोल गर्दै लाइपजिगलाई ३–१ को स्थितिमा ल्याए । ८७ औं मिनेटमा हालाण्डले व्यक्तिगत दोस्रो गोल गर्दै डर्टमण्डलाई ४–१ को जित दिलाए ।
बुन्डेस लिगा फुटबलमा कमजोर बनेको डर्टमण्डले जर्मन कप फुटबलको उपाधि जित्न सफल भएको हो ।
