काठमाडौं । नेपाल सुपर लिग (एनएसएल) अन्तर्गत आज (शनिबार) दुई खेल हुँदैछन् । पहिलो संस्करणको फ्रेन्चाइज फुटबल प्रतियोगितामा आज हुने दुबै खेल महत्वपूर्ण रहेका छन् ।
 
त्रिपुरेश्वरस्थित दशरथ रंगशालामा हुने दुई खेलले ‘प्ले अफ’ पुग्ने चारै टोलीको टुंगो लाग्नेछ । निकै नै रोमाञ्चक बनेको प्रतियोगितामा धनगढी एफसी र काठमाडौं रेजर्सले प्ले अफमा स्थान बनाइसकेका छन् । 

अब दुई टिम प्लेअफमा पुग्न बाँकी छ । आज हुने पहिले खेलमा विराटनगर सिटी एफसी र ललितपुर सिटी एफसीबीच प्रतिस्पर्धा हुनेछ । दुई टोलीबीचको खेल दिउँसो २ः३० बजे सुरु हुनेछ । आजको खेलमा दुबै टोलीलाई जितको आवश्यक छ । विराटनगर ५ खेलमा ७ अंक जोडेर चौंथो स्थानमा छ । ललितपुरलाई हराएमा विराटनगरले शीर्ष चारमा उक्लिनेछ । यदि बराबरी भएमा भने विराटनगरले अन्य टोलीको नतिजा कुर्नु पर्नेछ । 

यता, ललितपुरलाई प्ले अफ पुग्न जित निकाल्नै पर्नेछ । बराबरी या हार भएमा ललितपुर प्रतियोगिताबाट बाहिरिने छ । ललितपुर ५ खेलमा ६ अंक जोडेर पाँचौं स्थानमा छ । आजनै हुने दोस्रो खेलमा धनगढी एफसी र बुटवल लुम्बिनी एफसीबीच प्रतिस्पर्धा हुनेछ ।

आजको खेमला जित निकाल्दै धनगढी आफूलाई शीर्ष स्थानमा रहँदै प्रतियोगिताको प्लेअफमा पुग्ने टोलीको रुपमा चिनाउन चाहन्छ । धनगढी भने यसअघि नै प्लेअफमा पुगिसकेको छ । धनगढीले ५ खेलमा १० अंक जोडेको छ । बुटवल ५ खेलमा ५ अंक जोडेर छैटौं स्थानमा छ ।

बुटवललाई भने प्लेअफमा स्थान बनाउन अन्तिम खेलमा फराकिलो जित निकाल्नै पर्ने दबाब छ । फराकिलो जित निकाल्न नसकेमा भने बुटवल प्रतियोगिताबाट नै बाहिरिने छ ।