काठमाडौं । नेपालमा दैनिक १८ जनाले आत्महत्या गर्ने गरेको पाइएको छ । प्रहरी प्रधान कार्यालयको चालु आर्थिक वर्षको फागुनसम्मको तथ्यांकले यस्तो देखाएको हो ।

प्रहरी प्रधान कार्यालयका अनुसार चालु आर्थिक वर्षको फागुन मसान्तसम्म अर्थात् आठ महिनाको अवधिमा चार हजार ४८३ आत्महत्याका घटना भएका छन् । यो दैनिक १८ जना बढी हो ।

आर्थिक वर्ष ०७६/७७ को सोही अवधिमा तीन हजार ५३४ आत्महत्याका घटना भएका थिए । तुलनात्मक रूपमा चालु आर्थिक वर्षमा आत्महत्यासम्बन्धी घटनाहरू २६.८५ प्रतिशतले वृद्धि भएको देखिएको छ ।

यस्तै, पछिल्ला ४४ महिना अर्थात् चालु आर्थिक वर्षको फागुन मसान्तसम्म २१ हजार ७८७ जनाले आत्महत्या गरेका छन् ।

आर्थिक वर्ष ०७४/०७५ मा पाँच हजार ३१७ जनाले आत्महत्या गरेको प्रहरी तथ्यांकमा उल्लेख छ । आर्थिक वर्ष ०७६/७७ मा यो संख्या बढेको देखिन्छ । सो अवधिमा पाँच हजार ७४६ जनाले आत्महत्या गरेको देखिन्छ । आर्थिक वर्ष ०७६/०७७ मा ६ हजार २४१ जनाले आत्महत्या गरेको पाइएको छ ।

चालु आर्थिक वर्षको आठ महिनामा भने चार हजार ४८३ जनाले आत्महत्या गरेको देखिन्छ । प्रहरी तथ्यांकमा महिलाभन्दा पुरुषले बढी आत्महत्या गर्ने गरेको देखिएको छ । यसबाहेक पछिल्लो समय बालबालिकाले पनि आत्महत्याको बाटो रोजेको देखिन्छ ।

झुन्डिएर आत्महत्या गर्नेहरु बढी छन् । यसबाहेक खोलामा हामफालेर, विषादी सेवन गरेर पनि आत्महत्या गर्नेहरु बढी छन् ।

प्रहरी अधिकारीहरुका अनुसार नेपाल विश्वमा बढी आत्महत्या हुने देशहरूमध्ये शीर्ष १२ भित्र पर्छ । चालु आर्थिक वर्षमा आत्महत्या गर्नेको संख्या बढ्नुको पछाडि कोरोना महामारीले उत्पन्न गरेका कारणहरु पनि रहेको प्रहरी अधिकृतहरु बताउँछन् । व्यापारमा घाटा, बैंकको ऋणलगायत कारणले कतिपयले आत्महत्याको बाटो रोजेको देखिन्छ ।

तर, धेरैजसो आत्महत्यामा सम्बन्धमा भएको प्रेममा धोका, मानसिक तनाव, पारिवारिक तनाव, बेरोजगारी, कमजोर आर्थिक अवस्था मुख्य कारण रहेको पाइएको छ ।